U vioscy na Jasieldzie chłopiec vyratavaŭ dźviuch plamieńnic, a sam patanuŭ — padrabiaznaści trahiedyi
Uviečary 30 červienia adbyłasia trahiedyja na race Jasielda, niepadaloku ad vioski Busa Ivanaŭskaha rajona. Małady chłopiec paśviŭ karoŭ. Da jaho pryjšła žonka ź dźviuma małymi plamieńnicami, jakija vyrašyli pakupacca ŭ race. U niejki momant jana pačała klikać na dapamohu. Mužčyna kinuŭsia ich ratavać. Žonka vybrałasia z vady samastojna, muž paśpieŭ vypchnuć dziaŭčynak da bieraha, adnak sam patanuŭ. Chłopca zvali Uładzisłaŭ Sacharevič. Jamu było 22 hady.
«Jon z prablemnaj šmadzietnaj siamji. Vypivali.
Ale sam Uładzisłaŭ — vielmi paradačny čałaviek. Jon sam karabkaŭsia pa žyćci, ale nikoli nie piŭ, zaŭsiody dobra pracavaŭ. Advučyŭsia ŭ licei ŭ Pinsku, ale viarnuŭsia da nas, bo nie było dapamohi i hrošaj, kab zastacca ŭ horadzie, — raskazvaje Ludmiła Mielnik, namieśnica pa žyviołahadoŭli pradpryjemstva «Moładava-Ahra», dzie pracavaŭ chłopiec. — Pracavaŭ u nas žyviołavodam: zimoj dahladaŭ karoŭ, letam paśviŭ.
Ničoha kiepskaha nie mahu ŭzhadać pra jaho. Zaŭsiody dapamahaŭ, zaŭsiody dobra pracavaŭ. Prosty charošy chłopiec».
U kastryčniku 2020 hoda Uładzisłaŭ ažaniŭsia. Sioleta 13 krasavika ŭ jaho naradziŭsia syn Arsienij.
«Syna vielmi lubiŭ. Ja była na vypasie, pytałasia: «Nu jak, Uład, tam tvoj synok?» A jon jak pra syna raskazvaŭ, to ŭvieś až śviaciŭsia. Płanavaŭ kupić dom tut, u Moładavie, jak zarobić hrošaj. Ale pakul žyŭ u Busie razam z baćkami, dapamahaŭ im. Kazaŭ: «Nie mahu pakul ad baćkoŭ źjechać, bo treba maci dapamahać», — uzhadvaje Ludmiła Mielnik. — Byŭ faktyčna adzinym karmilcam: baćka lažyć paśla insulta, prykuty da łožka. Siostry žyvuć asobna sa svaimi siemjami».
Dziaciej adnoj sa svaich siaścior Uładzisłaŭ i vyratavaŭ koštam ułasnaha žyćcia.
«Nie skažaš, što tam, dzie ŭsio adbyłosia, niebiaśpiečna, ale tam nie płavajuć. Ale voś niejak znajšłosia hłybokaje niejkaje miesca… Uładzisłaŭ palez ratavać tych dziaciej. Ich zmoh vyšturchnuć, ale sam nie vyratavaŭsia», — kaža Ludmiła Mielnik.
Pachavajuć chłopca 2 lipienia ŭ jaho rodnaj vioscy.
