«135 dzion finansavaj pravierki. Čystyja! Adbilisia!» DFR nie znajšoŭ parušeńniaŭ u bresckim teatry «Kryły Chałopa»
Kiraŭnik bresckaj prastory «Kryły Chałopa» Aksana Hajko paviedamiła, što zabrała dakumienty i kampjutar z Departamienta finansavych rasśledavańniaŭ Kamiteta dziaržkantrolu.
«135 dzion finansavaj pravierki. Čystyja! Adbilisia!», — napisała Hajko ŭ sacyjalnych sietkach.
27 studzienia hetaha hoda DFR pryjšoŭ u prastoru «Kryły Chałopa», jakuju adkryŭ adnajmienny teatr. Pierad hetym inśpiektary departamienta praviali anałahičnaje mierapryjemstva doma ŭ Hajko.
Jak patłumačyła Aksana, uvieś hety čas prachodziła finansavaja pravierka.
«Pryčym va ŭsich bakoŭ — samoj prastory, IP, mianie jak fizičnaj asoby. Taksama była pravierka MNS. Usie hetyja pravierki my prajšli».
Ale rachunki pa-raniejšamu aryštavanyja. 18 červienia Hienprakuratura pryniała rašeńnie likvidavać «Kryły Chałopa» za dziejnaść, jakaja «nie adpaviadaje metam i pradmietu, zajaŭlenym u statucie».
U pryvatnaści, jak śćviardžała prakuratura, sa žniŭnia 2020 hoda «Teatr Kryły Chałopa» «arhanizoŭvaŭ vystavy prac i mastackija prezientacyi tvoraŭ, jakija byli nakiravanyja na farmiravańnie ŭ hramadzian stanoŭčaha staŭleńnia da ździajśnieńnia supraćpraŭnych dziejańniaŭ».
«Što budziem rabić, pakul skazać ciažka. Na hetym etapie adkazvajem na zapyty ŭsich mahčymych instancyj z nahody likvidacyi», — kaža Aksana Hajko.
