Volha Karač stvaryła novuju kaalicyju. Chto hetyja ludzi?
Spojler: pra isnavańnie niekatorych vy nie padazravali.
Kiraŭnica kampanii «Naš dom» Volha Karač, jakaja žyvie ŭ Vilni, jašče niekalki tydniaŭ tamu anansavała ab stvareńni kaalicyi. Ciapier jaje płany materyjalizavalisia, utvareńnie atrymała nazvu ŠAS (Štab abjadnanych siłaŭ) — pa-rusku ŠOS. Pahladzim, chto ŭpisaŭsia ŭ hetuju inicyjatyvu.
Dźmitryj Ščyhielski
Doktar-psichijatar. Viadomaść u Biełarusi nabyŭ u 2001 hodzie, kali zavočna pastaviŭ dyjahnaz Alaksandru Łukašenku. Paśla hetaha pierabraŭsia ŭ ZŠA, žyvie ŭ Ńju-Jorku. Sam siabie pazicyjanuje jak «siaredni biznesmien». Jeździŭ na vajnu va Ukrainu dobraachvotnikam, akazvaŭ bajcam pasłuhi psichołaha i psichijatra. Byŭ siarod tych «zmoŭščykaŭ», jakija nibyta rychtavali zamach na Alaksandra Łukašenku. Byŭ u siabroŭskich adnosinach ź Jurasiom Ziankovičam, jakoha aryštavali ŭ Maskvie.
Alaksandr Pierapiečka
61 hod, žyvie ŭ Sietle (ZŠA). Skončyŭ aśpiranturu BDU i daktaranturu Vašynhtonskaha ŭniviersiteta. Doktar fiłasofii pa śpiecyjalnaści «Ekanamičnaja, sacyjalnaja i palityčnaja hieahrafija». Udzielnik mižnarodnych navukova-analityčnych prahram u Biełarusi, Rasii, ZŠA i Francyi. Ekśpiert pa statystyčnych madelach i Uschodniaj Jeŭropie. Kansultant pa hieapalitycy, hieastratehii i elitach. Cikava, što navat padčas strymu ab prezientacyi ŠAS zaŭsiody nazyvaŭ našu krainu «Biełaruśsija». Jašče adzin udzielnik zum-kanfierencyj, paśla jakich Ziankoviča, Fiadutu i Kastusiova abvinavacili ŭ sprobie dziaržpieravarotu i zamachu na Łukašenku.
Viera Chortan
Akciorka. Naradziłasia ŭ 1971 hodzie ŭ Minsku, skončyła fiłasofski fakultet BDU. Žyvie ŭ Łondanie, hraje ŭ adnym z anhlijskich teatraŭ, šmat zdymałasia ŭ kino i sieryjałach. Viadzie błoh na jutubie, jaki maje 72 padpisčyki. Taksama stvaralnica «BiełDyjaspara TB», jaki maje 1900 padpisčykaŭ. «Mianie zaniesła ŭ revalucyju paśla 9 žniŭnia, da hetaha ja nie zajmałasia palityčnaj dziejnaściu», — skazała jana. Kaža, što jaje zadača — «dapamahčy zachodniamu hramadstvu razabracca ŭ padziejach u Biełarusi».
Jarasłaŭ Hryhorjeŭ
22 hady. Rodam z Kalininhrada, maci — biełaruska, baćka — rasijanin. U siamihadovym uzroście pierajechaŭ u Mahiloŭ. Vučyŭsia ŭ Biełaruskim instytucie pravaznaŭstva. Siabra ruchu «Za Svabodu». Na prezientacyi ŠAS padavaŭ siabie jak «nacyjanalista, kansiervatara, prychilnika Paŭła Sieviarynca i Zianona Paźniaka». Viadzie małalikija satyryčnyja supołki «Biełarusijana» na jutubie, instahramie i telehramie. Ciapier žyvie ŭ Vilni.
Siarhiej Druhakoŭ
Pradstaŭnik biełaruskaj dyjaspary ŭ Šatłandyi, žyvie ŭ Abierdzinie. Rodam z Oršy. Bolš asabliva skazać pra jaho niama čaho.
Pavieł Kułažanka
Były śpiecnazaviec ź Viciebska, jaki prymaŭ udzieł u razhonie Płoščy-2010. Žyvie ŭ Bruklinie (ZŠA), u minułym bajec MMA, ciapier pracuje piersanalnym trenieram. Intares da biełaruskaj palityki źjaviŭsia paśla vybaraŭ 2020 hoda, zavioŭ jutub-kanał, a taksama časta razdaje intervju dla emihracyjnych ŚMI. Pazicyjanuje siabie jak radykalny prychilnik pieramienaŭ, staŭ hołasam inicyjatyvy «Supraciŭ». Prytrymlivajecca krajnie pravych pohladaŭ. Žorstki krytyk Śviatłany Cichanoŭskaj, a taksama jaje štaba.
Čytajcie jašče: Chto taki były amapaviec Pavieł Kułažanka, jaki sprabuje stać radykalnym palityčnym lidaram?
Beła Foks
Viadučaja Radyjo Unet. Prezientuje siabie jak arhanizatarka pratestaŭ suprać intehracyi Biełarusi i Rasii ŭ Kijevie i Budapiešcie. U Biełarusi była mižnarodnym sakratarom Usiebiełaruskaha kanhresu za niezaležnaść. Pracavała na «Biełsacie» i ŭ «Pres-kłubie». Źjechała ź Biełarusi ŭ pačatku kastryčnika 2020 hoda. Śpikier narodnaha pasolstva Biełarusi ŭ Litvie.
***
Ščyhielski adznačyŭ, što kaalicyja budujecca na pastułacie, što vybary ŭ Biełarusi ŭ žniŭni nie adbylisia i na hety momant niama zakonnaj ułady. Jon śćviardžaje, što hałoŭnaje patrabavańnie — heta źmiena praviłaŭ hulni ŭ Biełarusi, a nie prosta novyja vybary pa starych kanśpiektach.
Čytajcie jašče: Chto takaja Volha Karač, jakaja choča padsiadzieć Cichanoŭskuju?
