Za «ekstremisckaje» fota partał Hrodna.life aštrafavali na 15 tysiač rubloŭ
Partał Hrodna.life aštrafavali na 14 500 rubloŭ za publikacyju fota z łahatypam telehram-kanała, pryznanaha ekstremisckim.
Hałoŭny redaktar Alaksiej Šota vystupaŭ u sudzie jak pradstaŭnik jurydyčnaj asoby. Raniej za hety ž vypadak aštrafavali na 725 rubloŭ redaktarku prajektaŭ partała Irynu Novik. Ahułam supracoŭniki redakcyi majuć zapłacić za raźmiaščeńnie «niezakonnaha» zdymka 15 225 rubloŭ, piša «Radyjo Svaboda».
Partał abvinavacili ŭ tym, što na im 24 maja ŭ artykule pra łajnier Ryanair raźmiaścili fota samalota z łahatypam «ekstremisckaha» telehram-kanała.
Jak patłumačyŭ śviedka pa spravie milicyjant Leninskaha RAUS Andrej Pihulski, jon vyjaviŭ «ekstremisckaje» fota. Hrodzienskija sajty prahladajuć na najaŭnaść «ekstremizmu» amal kožny dzień. Śpis sajtaŭ Pihulski nazvać nie zdoleŭ, pryvioŭ u prykład tolki Hrodna.life i Newgrodno.
Alaksiej Šota patłumačyŭ, što zaŭvažyŭ publikacyju fotazdymka praz 5 hadzin paśla publikacyi i adrazu jaho vydaliŭ.
Heta ŭžo druhi raz sioleta, kali Hrodna.life sudziać za «ekstremizm». Papiaredni štraf składaŭ 400 bazavych vieličyniaŭ.