Žonka žurnalista Andžeja Pačobuta: «Jamu nieadkładna patrebnaja špitalizacyja»
Pačobut u žodzinskim SIZA zachvareŭ na karanavirus. Niekalki dzion tamu jon zdoleŭ pieradać hetuju navinu praź inšych aryštantaŭ.
Pra heta Aksana Pačobut, žonka palitviaźnia, raskazała partału Kresy24.pl, piša Radyjo Svaboda.
Pa słovach žonki, Andrej adčuvaje siabie słaba, kašlaje, hublaje siły. Blizkija niepakojacca pra stan zdaroŭja palitviaźnia, bo ŭ jaho chvoraje serca, źbivajecca rytm. Raniej jon časta hublaŭ prytomnaść.
Žonka viedaje, što Pačobut ciapier znachodzicca ŭ pierapoŭnienaj kamery, dzie siadziać 13 čałaviek. Tam dušna, nie chapaje pavietra, jość vošy. Aksana miarkuje, što stan Andreja moža pahoršycca ad śpioki, jakaja kiepska ŭpłyvaje na ludziej z zachvorvańniami serca.
Administracyja SIZA ŭ jakaści vyklučeńnia dazvoliła Pačobutu lažać na narach 2 hadziny ŭ dzień. Uvieś astatni čas udzień jon musić abo stajać, abo chadzić. Nieadnarazova viaźni paviedamlali, što dla «palityčnych» stvaryli asablivyja ŭmovy źniavoleńnia: im nielha siadzieć abo lažać z 6:00 da 22:00.
Andreju Pačobutu 48 hadoŭ. Žyvie ŭ Horadni. Žanaty, dvoje dziaciej: starejšaja dačka vučycca ŭ Horadni ŭ medyčnym universytecie, małodšy syn chodzić u škołu. Viadomy žurnalist i hramadzki dziejač, siabra niezarehistravanaha Sajuzu palakaŭ Biełarusi. U 2002 hodzie pryjšoŭ u žurnalistyku.
Sioleta 25 sakavika da Pačobuta pryjšli ź pieratrusam i zatrymali. Jon prachodzić u «polskaj spravie», jakuju Hieneralnaja prakuratura zaviała «za raspalvańnie relihijnaj i nacyjanalnaj varožaści» (častka 3 artykułu 130 KK) na Anžaliku Borys i inšych asobaŭ. Ciapier Pačobut znachodzicca ŭ žodzinskim SIZA.
Siabroŭ niezarehistravanaha SPB Irenu Biarnackuju, Maryju Ciškoŭskuju, Hannu Panišavu, jakija prachodziać pa hetaj ža spravie, u traŭni vyzvalili ź SIZA ŭzamien za vyjezd u Polšču. U niavoli pa hetaj spravie zastajucca tolki Pačobut i Borys.
