G7 vykazała «hłybokuju zaniepakojenaść» incydentam z Ryanair
Taksama Rasiju zaklikali spynić «destabilizacyjnyja pavodziny», ale našmat bolšaja ŭvaha ŭ zajavie pa vynikach samitu lidaraŭ «Vialikaj siamiorki» nadadziena Kitaju.
Lidary krain Hrupy siami (G7) zaklikajuć da miru i stabilnaści ŭ Tajvańskim pralivie. Pra heta paviedamiła ŭ niadzielu ahienctva Reuters sa spasyłkaj na finalny prajekt pahadnieńnia pa vynikach trochdzionnaha samitu niefarmalnaha abjadnańnia Vialikabrytanii, Hiermanii, Italii, Kanady, ZŠA, Francyi i Japonii ŭ horadzie Karbis-Bej.
«My padtrymlivajem važnaść miru i stabilnaści ŭ Tajvańskim pralivie», — havorycca ŭ prajekcie dakumienta. U sumiesnaj zajavie lidaraŭ «siamiorki» takaja fraza fihuruje ŭpieršyniu. Taksama kiraŭniki dziaržaŭ-udzielnic G7 vykazali «surjoznuju zaniepakojenaść situacyjaj u Paŭdniova-Kitajskim i Uschodnie-Kitajskim morach» i vystupili suprać lubych adnabakovych sprobaŭ źmianić status-kvo ŭ hetym rehijonie.
Tajvań kirujecca ŭłasnaj administracyjaj z 1949 hoda, kali na vostraŭ źbiehli reštki sił Hamińdana na čale z Čan Kajšy, paciarpieŭšy parazu ŭ hramadzianskaj vajnie ŭ Kitai. Z tych časoŭ Tajvań zachoŭvaje ściah i niekatoryja inšyja atrybuty raniejšaj Kitajskaj Respubliki, jakaja isnavała na macieryku da prychodu da ŭłady kamunistaŭ. Piekin ličyć vostraŭ adnoj z pravincyj KNR.
Taksama krainy G7 zaklikali Piekin pavažać pravy i svabody ŭjhuraŭ u Sińczian-Ujhurskim aŭtanomnym rajonie (SUAR) KNR, a taksama aŭtanomiju Hankonha.
Karanavirus
Krainy G7 zaklikajuć da praviadzieńnia druhoha etapu rasśledavańnia pachodžańnia karanavirusa pad kiraŭnictvam Suśvietnaj arhanizacyi achovy zdaroŭja (SAAZ).
Taksama lidary G7 pastavili zadaču zabiaśpiečyć śviet 1 młrd vakcyn ad COVID-19 na praciahu 2022 hoda.
Źmianieńnie klimatu
G7 maje namier pašyryć da $100 młrd štohadovaje finansavańnie baraćby sa źmianieńniem klimatu ŭ ramkach Paryžskaha pahadnieńnia pa klimacie. Adznačajecca, što adnym z hałoŭnych atrymalnikaŭ dapamohi stanuć najmienš zabiaśpiečanyja krainy, jakija raźvivajucca.
Lidary krain Hrupy siami abaviazalisia damahčysia nulavoha vykidu SO2 u svaich krainach jak maha chutčej i nie paźniej za 2050 hod, havorycca ŭ finalnym prajekcie kamiunikie. U im taksama padkreślivajecca namier krain pieravažna admovicca ad vuhlevadarodnaj syraviny ŭ enierhietycy ŭ 2030-ch hadach.
G7 pra Rasiju
G7 zaklikała Rasiju spynić «destabilizujučyja pavodziny», a taksama vykazałasia za stabilnyja i pradkazalnyja adnosiny z Rasijaj, paviedamlaje Bloomberg sa spasyłkaj na prajekt kamiunikie.
«My paćviardžajem našu zacikaŭlenaść u stabilnych i pradkazalnych adnosinach z Rasijaj. My budziem praciahvać uzajemadziejničać [z Rasijaj] tam, dzie jość śfiery, jakija ŭjaŭlajuć uzajemnuju cikavaść. My paćviardžajem naš zaklik da Rasii spynić svaje destabilizujučyja pavodziny i złamysnuju dziejnaść, uklučajučy ŭmiašańnie ŭ demakratyčnyja sistemy inšych krain, a taksama [zaklikajem] vykanać svaje mižnarodnyja abaviazacielstvy ŭ halinie pravoŭ čałavieka», — adznačajecca ŭ prajekcie vynikovaj zajavy.
Incydent z samalotam Ryanair
Baki vykazali «hłybokuju zakłapočanaść» u suviazi ź incydentam z pasadkaj samalota irłandskaj avijakampanii Ryanair u Minsku, na borcie jakoha znachodziŭsia Raman Pratasievič, taksama paviedamlaje Bloomberg.
