Śpiecsłužby Hrecyi: Za Pratasievičam u Afinach sačyli nieviadomyja z rasijskimi pašpartami
Uładalniki rasijskich pašpartoŭ sačyli za błohieram-dysidentam ciaham niekalkich dzion na Krycie, pierš čym jon sieŭ na fatalny rejs dadomu, paviedamiŭ hrecki čynoŭnik VICE World News.
Za Ramanam Pratasievičam, zatrymanym u Minsku paśla prymusovaj pasadki samalota Afiny — Vilnia, sačyli nieviadomyja ludzi — vierahodna, biełaruskija ci rasijskija ahienty vyviedki — na praciahu niekalkich dzion u Hrecyi pierad palotam, ličać śledčyja sa słužby ŭnutranaj biaśpieki Hrecyi.
Niezadoŭha da palotu, pa słovach kaleh Pratasieviča, jon bačyŭ, jak ludzi išli za im pa afinskim aeraporcie i fatahrafavali. Ličycca, što hetaja kamanda nazirała za Pratasievičam, kab vyznačyć, jakim rejsam jon palacić nad pavietranaj prastoraj Biełarusi.
Pradstaŭniki hreckaj nacyjanalnaj raźviedvalnaj słužby (EYP) paviedamili miascovym ŚMI, što pa mienšaj miery try nieviadomyja apieratyŭniki sačyli za Pratasievičam u Afinach z momantu jaho prybyćcia pierad kanfierencyjaj 9 maja. Paśla taho jak kanfierencyja skončyłasia 16 maja, Pratasievič adpraviŭsia ŭ adpačynak na niekalki dzion na Kryt sa svajoj siabroŭkaj, dzie jany taksama znachodzilisia pad nahladam, jak miarkujuć, rasijskich ci biełaruskich vyviednikaŭ, paviedamiŭ hrecki čynoŭnik.
«Kali my źbirajem zapisy kamier videanazirańnia z hatelaŭ, z Kryta i z aeraporta, stanovicca jasna, što za imi sačyli śpiecyjalisty vyviedki z rasijskimi pašpartami», — skazaŭ pradstaŭnik MUS, jaki paprasiŭ nie nazyvać jaho imia. «My ličym, što hetyja ludzi dziejničali ad imia Biełarusi i dapamahli ŭstanavić, što Pratasievič znachodziŭsia na borcie samalota, kali jon pralataŭ nad Biełaruśsiu».
Pradstaŭnik vyviedki zajaviŭ, što hreckija słužby byli razhnievanyja parušeńniem nieaficyjnych praviłaŭ, jakija pavinny zabaraniać ahresiŭnyja apieracyi ŭ jeŭrapiejskaj stalicy.
