Za maj pa «pratesnych» kryminalnych spravach asudžana nie mienš za 109 čałaviek. Amal pałova ź ich u Bresckaj vobłaści
Pravaabaroncy praciahvajuć fiksavać rost kolkaści zaviedzienych kryminalnych spraŭ, źviazanych z pratestami.
21 maja Hienprakuratura nazvała kolkaść asudžanych pa «pratesnych» kryminalnych spravach — 682 čałavieka. Da hetaj katehoryi kryminalnych spraŭ Hienieralnaja prakuratura adnosić fakty ŭdziełu ŭ masavych biesparadkach, ździajśnieńni dziejańniaŭ, što hruba parušajuć hramadski paradak i źviazanyja ź nievykanańniem zakonnych patrabavańniaŭ pradstaŭnikoŭ ułady, hvałtu i pahrozy jaho ŭžyvańnia da pravaachoŭnikaŭ, ich publičnaj abrazy, apahańvańnia nadpisami čužoj majomaści, chulihanstva, źniavahi da dziaržaŭnaj simvoliki.
Pa stanie na 1 červienia kolkaść palitviaźniaŭ składaje 449 čałaviek. Za miesiac kolkaść palityčnych źniavolenych uzrasła na 99 čałaviek. Asudžana na dadzieny momant 280 palitviaźniaŭ, u dačynieńni da 43 idzie sudovaje raźbiralnictva. 126 palitviaźniaŭ čakajuć razhladu ich spraŭ u sudzie.
Pravaabaroncam viadoma nie mienš čym pra 109 asudžanych za maj pa «pratesnych» kryminalnych spravach.
Najbolšaja kolkaść hramadzian asudžajecca pa palityčna matyvavanych kryminalnych spravach u haradach, dzie pratesty suprać falsifikacyi vynikaŭ hałasavańnia ŭ žniŭni 2020 hoda nasili samy masavy charaktar. Hieahrafija asudžanych u mai, pra jakija viadoma pravaabaroncam, vyhladaje nastupnym čynam:
- Minsk — 30 čałaviek;
- Bresckaja vobłaść — 50 čałaviek (Brest, Žabinka, Pružany, Kobryn, Baranavičy, Ivaceviči);
- Mahiloŭskaja vobłaść — 11 čałaviek (Mahiloŭ, Babrujsk, Asipovičy);
- Homielskaja vobłaść — 6 čałaviek (Homiel);
- Minskaja vobłaść — 6 čałaviek (Maładziečna, Smalavičy, Žodzina, Minski rajon);
- Viciebskaja vobłaść — 4 čałavieki (Viciebsk, Orša);
- Hrodzienskaja vobłaść — 2 čałavieki (Hrodna).
