U 2021 hodzie biełaruski les daje fantastyčnuju rentabielnaść
Sioleta fłahmany lasnoj haspadarki rezka palepšyli svaje finansavyja pakazčyki, piša sajt banki24.by. Heta źviazana sa skačkom cen na draŭninu na suśvietnym rynku.
Pa stanie na maj ab finansavych vynikach za kvartał zrabili spravazdaču fłahmany haliny. Vyručka bujnych i siarednich pradpryjemstvaŭ u śfiery lesavodstva i lesanarychtovak za 3 miesiacy vyrasła na 47,3% da 523,8 młn BYN. Pry hetym sabiekošt pradukcyi ŭ halinie pavialičvaŭsia nie tak chutka — na 22,2% da 323,5 młn BYN. Jak vynik, lesavody i lesasieki padniali prybytak z prodažaŭ u 2,8 razy da minułaha hoda.
U hrašovym vyražeńni prybytak haliny skłaŭ 137,4 młn BYN. Kratny rost prybytku pryvioŭ da padvajeńnia rentabielnaści prodažaŭ. Kali ŭ 2020 hodzie siaredniaja rentabielnaść za 1 kvartał skłała 13,8%, to ŭ 2021-m — 26,2%.
U vyniku siarod uzbujnienych vidaŭ dziejnaści lesahaspadarčaja halina zaniała druhoje miesca pa ŭzroŭni rentabielnaści. Trochi vyšejšyja za siarednija pakazčyki byli tolki ŭ śfiery finansaŭ i strachavańnia (26,6%).
Udzielnaja vaha fłahmanaŭ z rentabielnaściu prodažaŭ u miežach 20-30% skłała kala 42%, a z rentabielnaściu bolš za 30% — kala 29,5%. Takaja dola vysokaprybytkovych biznesaŭ źjaŭlajecca najlepšaj siarod usich uzbujnienych vidaŭ zaniatkaŭ u ekanomicy.
Taksama ŭ 2021-m nie było prykmietnaj devalvacyi biełaruskaha rubla da košyka valut. Tamu łahična, što i čysty prybytak vyras kratna — u 9,3 raza da 65,9 młn BYN. Dola stratnych biznesaŭ u kančatkovym vyniku skaraciłasia z 8% da 2,7%, a suma strat stratnych kampanij-fłahmanaŭ — u 6,4 razy da 0,7 młn BYN.
Taksama ŭ 2021 hodzie źniziłasia biahučaja pazykovaja nahruzka na halinu. Za 3 miesiacy fłahmany pieraličyli kredytoram 20,2 młn BYN, što na 24,2% mienš, čym hodam raniej. Na hetyja mety lesahaspadarniki vydatkavali ŭsiaho 3,9% vyručki.
