U Maskvie palicyja sarvała pakaz śpiektakla pra padziei žniŭnia ŭ Biełarusi VIDEA
U Maskoŭskim Teatry.doc viečaram u subotu była sarvanaja premjera śpiektakla režysiora Siarhieja Hindylisa «Susiedzi», pryśviečanaha padziejam žniŭnia 2020 hoda ŭ Biełarusi. Pra heta paviedamlaje Radyjo Svaboda.
Prykładna praz paŭhadziny paśla pačatku śpiektakla ŭ zału ŭvajšli supracoŭniki palicyi, jakija spynili akcioraŭ i paviedamili hledačam, što pastupiŭ sihnał pra zakładzienuju ŭ pamiaškańni vybuchoŭku. Ludzi zreahavali na słovy supracoŭnika palicyi śmiecham i apładysmientami, ale byli vymušanyja pakinuć zału.
Akciory praciahnuli śpiektakl na vulicy. Palicyja papiaredziła ich i hledačoŭ, što jany mohuć być zatrymanyja.
Aŭtary śpiektakla, siarod jakich biełarusy i rasijanie, apisvajuć jaho tak:
«Razam ź miedyjaprajektam «Žnivień 2020» my sabrali historyi tych, chto paciarpieŭ ad dziejańniaŭ siłavikoŭ paśla vybaraŭ u Biełarusi. Doktar, studentka, emihrant, jaki viarnuŭsia ŭ hetyja dni na radzimu, pradziusar, aktrysa, prymalnica hruzaŭ na Minskim vakzale raspaviadajuć pra toje, što im daviałosia pieražyć letam 2020 hoda.
U śpiektakli, stvoranym u technicy headphone verbatim my hladzim na biełaruskija padziei vačyma ich niepasrednych udzielnikaŭ. Akcior čuje ŭ słuchaŭkach hołas hieroja i prajhraje jaho ŭ realnym časie, što dazvalaje z maksimalnaj dakładnaściu pieradać pramovu i intanacyju».
