Maci-hierainia. Piaciora dziaciej zastalisia z babulaj paśla zatrymańnia baćkoŭ za palityku
38-hadovaja Volha Załatar trapiła na Vaładarku, na nastupny dzień sudździa Kaciaryna Novikava adpraviła na sutki jaje muža.
Volha Załatar z mužam i dziećmi. Fota sa staronki Volhi Załatar u fejsbuku
18 sakavika žycharku Ždanovič Minskaha rajona Volhu Załatar zatrymaŭ HUBAZiK. Hetaje ŭpraŭleńnie milicyi, jakoje maje zajmacca arhanizavanaj złačynnaściu i karupcyjaj, za apošni hod pieraklučyłasia na palityčnyja spravy. Pa słovach susiedziaŭ, siłavikoŭ było kala dziesiaci. «My z žonkaj tak adrazu i zrazumieli, što heta za palityku, bo Volha była takaja aktyŭnaja va ŭsim», — skazali «Našaj Nivie» susiedzi.
«Dziakuj. Ničoha nie treba. Moža, siońnia adpuściać», — adkazaŭ udzień 18-ha muž Volhi Siarhiej Hankievič inšamu susiedu, jaki spytaŭ, ci treba im niejkaja dapamoha.
Nie tolki nie adpuścili žonku, ale a 23-j hadzinie viečara zatrymali i samoha Siarhieja.
I pra Volhu, i pra Siarhieja susiedzi havorać z pavahaj. Heta šmat u čym typovaja siamja «pracavitaha siaredniaha kłasa». Jak i bolšaść žycharoŭ minskich pryharadaŭ, jany pracujuć u pryvatnych pradpryjemstvach abo na siabie. Zbudavali sabie dom.
Ale siamja Hankieviča i Załatar vyłučajecca kolkaściu dziaciej. Ich u siamji piaciora. Čatyry dački, starejšaj ź jakich 17 hadoŭ, i syn, mienšańki, jamu 4 hady. Pa słovach susiedziaŭ, Volhu zatrymali ŭ aŭtamabili, kali jana viezła 10-hadovuju dačku na zaniatki pa cymbałach.
38-hadovaja Volha Załatar stała dobra viadomaj u Ždanovičach paśla minułaha hoda. Jana była naziralnicaj na miascovym učastku dla hałasavańnia.
«U nas čałavieki try ci čatyry pajšli ŭ naziralniki, podpisy źbirali za heta. Volha była samaja aktyŭnaja siarod ich. U jaje charaktar taki, lidarski, i pačućcio spraviadlivaści. Hetaja b užo naša deputatka była, kali b była demakratyja», — kaža žycharka pasiołka, maładaja piensijanierka.
Volha Załatar. Fota ź jaje staronki ŭ fejsbuku
Da nazirańnia na ŭčastku Volhu Załatar tak i nie dapuścili, tam zasiadali tolki naziralniki ad prałukašenkaŭskich arhanizacyj. Naziralniki ž ź liku žycharoŭ, jakija vyłučalisia šlacham zboru podpisaŭ, vymušanyja byli zastavacca ŭ dvary ŭčastka, raźmieščanaha ŭ škole-internacie dla ludziej z parušeńniami słychu i ŭkamplektavanaha jaho supracoŭnikami.
«Adna naša žančyna ŭ kamisiju vyłučałasia, my podpisy za jaje pastavili. Nie ŭziali! A našy naziralniki na parozie nazirali. Nu nam usio jasna stała pra hetyja vybary, — kaža susiedka-piensijanierka. — U nas napisali 40, zdajecca, pracentaŭ Cichanoŭskaj, a na susiednim učastku ŭ Tarasavie ŭ Cichanoŭskaj było 90, tam ličyli hałasy nie chavajučysia», — dadaje jana.
Vybary byli momantam palityzacyi žycharoŭ nie tolki Minska, ale i pryharadaŭ. Palityčnyja patrabavańni tut, jak i skroź, nakłalisia na sacyjalnyja. Ludzi hrupiravalisia ŭ miascovych čatach — spačatku ŭ vajbiery, paśla — u telehramie.
«Pahladzicie, jakija ŭ nas vulicy. Heta ž žach — jak u Afrycy. Paŭzieš siarod jam. Dyk heta jašče vulica Biełaruskaja, jana ličycca ŭ nas centralnaj, pa joj maršrutka jeździć. A na Maładziožnuju, Śvietłuju, Čystuju, Zachodniuju, Družnuju viasnoj u humovych botach tolki zachodź», — kaža nam mužčyna.
Sapraŭdy, vulica, na jakoj staić dom Volhi Załatar, usia ŭ jaminach.
Vulica Biełaruskaja — centralnaja ŭ hetaj častcy Ždanovič, pa joj jeździć maršrutka
Volha Załatar — biełaruskamoŭnaja pa žyćci, muž u jaje ruskamoŭny. Volha skončyła Licej BDU i Fakultet fiłasofii i sacyjalnych navuk BDU.
Paśla vybaraŭ, hłyboka ŭražanaja biescyrymonnaściu taho, što adbyvałasia na ŭčastkach, Volha Załatar praciahnuła hramadskuju dziejnaść. Susiedzi kažuć, što jana «i kala turmaŭ vałancioryła, i mnoha čaho rabiła». Pa ich słovach, Volhu trojčy zatrymlivali.
«Pieršy raz byŭ pratakoł za čajapićcie, — raskazvaje susiedka-piensijanierka. — Tady nie zatrymlivali, ale byŭ sud i štraf. Nu, pakazvali tak: za što chočaš budziem vas štrafavać. Za čajapićcie — štraf! Razumiejecie — što tam sabralisia i čaj pili, maŭlaŭ, niezakonna. Ludzi staralisia abjadnoŭvacca — dyk strašyli, kab nie abjadnoŭvalisia».
Druhi raz Volhu razam ź jašče adnoj žančynaj z susiedniaj vulicy zatrymali kala «murała Paŭła Łatuški».
Pavodle viersii milicyi, jany pryjšli admyvać farbu z zamalavanaj dniami vyjavy Paŭła Łatuški na ścianie elektraščytavoj. Tam ich čakała zasada, pisali ŭ miascovym čacie.
Pavieł Łatuška — kiraŭnik Nacyjanalnaha antykryzisnaha ŭpraŭleńnia, były ministr kultury i adzin ź lidaraŭ apazicyi. Da emihracyi ŭ žniŭni jon žyŭ u Ždanovičach. Jaho vyjava pratrymałasia na toj ścianie ŭ Ždanovičach kala piaci miesiacaŭ, paśla čaho «nieviadomyja» jaje skazili. Ale aŭtary vyjavy zahadzia pakryli jaje silikonam, tamu ludzi niekalki razoŭ zmyvali nasłajeńni farby. Ciapier na jaje miescy — kryvy čorny prastakutnik.
«Treci raz jaje zatrymali ŭ horadzie zimoj», — praciahvaje susied.
U telehram-kanale Spiski_Okrestina jość infarmacyja pra zatrymańnie Volhi Załatar 31 studzienia. U toj dzień niekalki socień čałaviek zładzili hulańni pa praśpiekcie Niezaležnaści bieź simvoliki napiaredadni «Usiebiełaruskaha narodnaha schodu». Niekalki dziasiatkaŭ ź ich zatrymali.
«Pomniu, my z mužam u toj dzień zakazali tort u «Je-dastaŭcy», dahavarylisia adnieści adnoj susiedcy, jakuju pierad tym zatrymlivali. Uviečary pišam joj u telehramie, što my vam tort pryniasiom. A jana piša: «Adniasicie lepš Volžynym dzieciam». A što ž takoje? «A vy nie čytali? Jaje ž zatrymali siońnia ŭ horadzie». Nu adnieśli my tym dzieciam», — raskazvaje inšaja žycharka Ždanovič.
2 lutaha sudździa Maskoŭskaha rajona Minska Taćciana Pirožnikava prysudziła Volzie 50 bazavych štrafu.
Susiedzi kažuć taksama, što Volha Załatar im raskazvała, što ŭ ich z mužam na 19 sakavika byli bilety ŭ Turcyju. Jany źbiralisia na čas viesnavych kanikuł trochi adklučycca i adpačyć.
U 14:30 18 sakavika Siarhiej pryjechaŭ z pracy dadomu, dzie paśla zatrymańnia mamy zastavałasia tolki 10-hadovaja dačka. U 23:00 jaho vyklikali ŭ RUUS, dzie aznajomili z pratakołam, u jakim było paznačana, što Siarhiej «u 13:50 u aknie pryvatnaha doma na ahulny ahlad vyviesiŭ niezarehistravany BČB-ściah, tym samym pravioŭ pikietavańnie».
Ab pratakole pa art. 24.23 KaAP mužčyna daviedaŭsia tolki ŭ RUUS, kudy jaho vyklikali kala 23:00 dla dopytu, adznačajuć pravaabaroncy.
Spravu Hankieviča, paviedamlaje telehram-kanał «Viasna naziraje», razhladała sudździa Minskaha rajona Kaciaryna Novikava:
«Sudu Siarhiej rastłumačyŭ, što ściahoŭ doma ŭ ich nie było, a tym bolš jany nie visieli na aknie. Tamu jon vykazaŭ zdahadku, što sami supracoŭniki vyviesili jaho, kab mieć padstavy dla zatrymańnia.
U pratakole paznačana, što pikietavaŭ Siarhiej u domie …8, voś tolki jon pražyvaje ŭ domie …6. U materyjałach spravy jość fota ściaha na aknie, ale Hankievič źviarnuŭ uvahu suda, što fota zroblena z dvara, a nie z vulicy.
Z vulicy voknaŭ doma na pieršymi paviersie nie vidać, tamu što aharodža vakoł doma vyšynioj 2,2 mietra.
Na sudzie dapytali i mamu Volhi Załatar Janinu, pa słovach jakoj, Siarhiej kateharyčna zabaraniaŭ trymać u domie BČB-ściah i kazaŭ, što jon apalityčny, bo jamu treba karmić piać dziaciej.
Janina Załatar taksama skazała, što Volha pierastała vychodzić na suviaź jašče ranicaj. Jana pavinna była advieźci dačku a 10-j na zaniatak pa cymbałach, ale vykładčyca paviedamiła, što dziaŭčynka ŭ škole nie źjaviłasia. Paźniej joj stała viadoma, što doma pravodzili pieratrus kala dziesiaci supracoŭnikaŭ HUBAZiKa.
Rapart składaŭ śviedka-milicyjant Pavieł Juchimienka. Na sudzie jon skazaŭ, što ŭkazany ŭ pratakole dom …8 — heta tolki techničnaja pamyłka.
Z dopytu śviedki-milicyjanta:
— Vy možacie skazać, što kankretna Siarhiej raźmiaściŭ ściah na aknie?
— Nie.
— Što adbyłosia sa ściaham, dzie jon?
— Supracoŭniki HUBAZiKa zabrali.
— Dazvoł na fatahrafavańnie ŭ domie davali?
— Nie.
— Ściah z vulicy bačny?
— Płot vyšejšy za mianie (2,2 mietra), ale ja mahu padskočyć, kab ubačyć akno pieršaha paviercha».
Sudździa Novikava mieła farmalnyja padstavy adpravić pratakoł na dapracoŭku, ale nie paličyła heta patrebnym i asudziła Siarhieja na 10 sutak aryštu.
Tak piaciora dziaciej zastalisia biez nahladu baćkoŭ.
Rasceńvać vyviešany ŭ aknie ci na bałkonie ściah albo vyjavu jak pikietavańnie pačali ŭ 2020 hodzie. Na dumku pravaabaroncaŭ, takaja interpretacyja — heta jurydyčny nonsens, a pakarańni na jaje asnovie — biezzakonnyja.
Pavodle infarmacyi susiedziaŭ, jakija spasyłajucca na advakata, Volha Załatar padazravanaja pa artykule 361 Kryminalnaha kodeksa. Heta samy ahulny artykuł, jaki vykarystoŭvajecca suprać palityčnych praciŭnikaŭ Alaksandra Łukašenki: «Zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś». Pa tym samym artykule prachodziać, da prykładu, siabry prezidyuma Kaardynacyjnaj rady.
My nie zmahli źviazacca z advakatam, kab pravieryć, ci heta sapraŭdy tak. Što kankretna stavicca ŭ vinu Volzie Załatar, pakul nieviadoma. Pa słovach svajakoŭ, jana znachodzicca ŭ SIZA-1 na vulicy Vaładarskaha.
Za situacyjaj z Volhaj Załatar sočyć supolnaść vypusknikoŭ Liceja BDU, a taksama kataliki Ždanovič (siamja Volhi Załatar — vierniki, naležać da miascovaj parafii).
Pa słovach miascovych žycharoŭ, usiaho ŭ pasiołku Ždanovičy niekalki dziasiatkaŭ čałaviek prajšli praz palityčnyja zatrymańni i štrafy. Prynamsi adzin miascovy žychar pryznany palitviaźniem — heta Alaksiej Bierazinski, asudžany na 3,5 hoda kałonii.
Troje sutak paśla zatrymańnia 38-hadovaj Volhi Załatar skančajucca zaŭtra, u niadzielu. Stanie jasna, ci zastaniecca ŭ turmie maci-hierainia ź minskaha pryharada.
