Studyja Pixar źniała multfilm «Duša» pra žyćcio paśla śmierci
U novym animacyjnym filmie ad stvaralnika papularnych multykaŭ «Uvierch» i «Hałavałomka» raspaviadajecca historyja pijanista, vypadkova pieraniesienaha ŭ nieziamny śviet. Heta pryhožaja i jaskravaja animacyja ad Pixar, źniataja režysioram Pitam Dokteram, sprabuje apisvać žyćcio da i paśla śmierci.
Hałoŭny hieroj Džo — afraamierykaniec siarednich hadoŭ, jaki žyvie ŭ Ńju-Jorku i padpracoŭvaje nastaŭnikam muzyki. Jaho hałoŭnaje zachapleńnie ŭ žyćci — džaz, ale zapavietnaja mara stać artystam i vystupać pierad natoŭpam amataraŭ džaza tak i zastałasia maraj. Hałoŭny hieroj užo hatovy źmirycca sa svaim losam nastaŭnika, jak raptam jamu vypadaje šaniec vystupić ź viadomym džazavym muzykam.
I jakraz tady, kali žyćcio Džo mahło stać bolš uzrušalnym i nasyčanym, jon padaje ŭ luk i traplaje ŭ nieziamny śviet, dzie sustrakaje dušu numar 22, jakaja nie choča naradžacca. Na praciahu tysiačahodździaŭ joj dapamahali znajści «iskru» vialikija ludzi ad Arystociela da Maci Terezy, toje pryznačeńnie, dziela jakoha varta naradzicca, ale ŭsio daremna. Na hety raz nastaŭnikam dušy 22 stanovicca Džo, ale jaho hałoŭnaja meta — parušyć praviły i viarnucca da svajho cieła na Ziamlu, u čym 22 zhadžajecca jamu dapamahčy.
Tak hałoŭnyja hieroi kidajucca va ŭcioki na Ziamlu, dzie duša Džo traplaje ŭ kata, a duša 22 akazvajecca ŭ ciele samoha Džo. Im nakanavana źviedać niamała novych dla siabie pačućciaŭ, kab u rešcie rešt adkazać samim sabie, ci vartaje žyćcio taho, kab jaho pražyć.
