«Što datyčyć Baskava, tut prezumpcyja nievinavataści». Biełaruski bok adkazaŭ Fazelu
Arhkamitet pa praviadzieńni čempijanatu śvietu pa chakiei 2021 hoda pa vynikach sustrečy z kiraŭnikom IIHF (Mižnarodnaj fiederacyi chakieja) Rene Fazelem apublikavaŭ na sajcie Saŭmina zajavu. Pryvodzim jaje tekst całkam.
Kiraŭnik Mižnarodnaj fiederacyi chakieja Rene Fazel (u centry) i kiraŭnik biełaruskaha chakieja Dźmitryj Baskaŭ (sprava) u vip-łožy na Minsk-arenie. Fota z sacsietak.
«Padčas praviedzienaha 11 studzienia 2021 hoda vizitu ŭ Respubliku Biełaruś Rene Fazela, prezidenta Mižnarodnaj fiederacyi chakieja na lodzie (dalej — MFCH), prajšła jaho sustreča z kiraŭnictvam arhanizacyjnaha kamiteta pa praviadzieńni čempijanatu śvietu pa chakiei z šajbaj 2021 hoda.
Padčas hetaj sustrečy ŭ adkrytym i kanstruktyŭnym klučy abmierkavanyja pytańni padrychtoŭki da praviadzieńnia čempijanatu śvietu pa chakiei z šajbaj 2021 hoda, adbyŭsia adkryty abmien mierkavańniami, u tym liku pa chvalujučych MFCH pytańniach, što tyčacca asobnych aśpiektaŭ situacyi ŭ krainie.
Arhanizacyjny kamitet pa praviadzieńni čempijanatu śvietu pa chakiei z šajbaj 2021 hoda paviedamlaje, što Respublika Biełaruś paćvierdziła svaju hatoŭnaść da praviadzieńnia dadzienaha čempijanatu. Respublika Biełaruś hatovaja zabiaśpiečyć u poŭnym abjomie ŭvieś kompleks nieabchodnych mierapryjemstvaŭ, u tym liku arhanizacyjnaha, supraćepidemičnaha charaktaru, a taksama zabiaśpiečyć biaśpieku i kamfortnaje znachodžańnie ŭdzielnikaŭ i haściej čempijanatu z ulikam rekamiendacyj MFCH, jakija nadyšli.
Adnosna pytańniaŭ, padniatych MFCH padčas rabočaj sustrečy z členami arhanizacyjnaha kamiteta, paviedamlajem nastupnaje.
1. Pry arhanizacyi čempijanatu biełaruski bok budzie prytrymlivacca rekamiendacyj i praviłaŭ, ustanoŭlenych MFCH dla praviadzieńnia spabornictvaŭ z ulikam pandemii COVID-19, a taksama zabiaśpiečyć dostup zamiežnym ŚMI da akredytacyi dla aśviatleńnia čempijanatu i harantuje stabilnuju pracu sietki Internet.
2. Biełaruski bok zabiaśpiečyć poŭnuju biaśpieku ŭdzielnikaŭ i hledačoŭ čempijanatu ŭ adpaviednaści sa svaimi abaviazacielstvami, jak i dla ŭsich inšych mižnarodnych spartyŭnych spabornictvaŭ, jakija praviedzienyja i pravodziacca ŭ Biełarusi.
3. Nibyta majučyja miesca fakty vyklučeńnia biełaruskich spartoŭcaŭ sa zbornych kamand i adchileńnia ad spabornictvaŭ za palityčnyja pohlady biespadstaŭnyja.
Biełaruski bok nadaść MFCH usiu nieabchodnuju fakturu, jakaja raniej nieadnarazova nakiroŭvałasia ŭ MAK i inšyja mižnarodnyja spartyŭnyja struktury. Razam z tym sapraŭdy mielisia fakty zatrymańnia i pryciahnieńnia da adkaznaści asobnych spartsmienaŭ za ŭdzieł u mierapryjemstvach, jakija parušajuć hramadski paradak, stroha ŭ ramkach biełaruskaha zakanadaŭstva.
4. U častcy pretenzij, jakija vyłučajucca ŭ dačynieńni da staršyni fiederacyi chakieja Biełarusi Dźmitryja Baskava, biełaruski bok zychodzić z pryncypu prezumpcyi nievinavataści jak bazavaha pravavoha pastułatu, ale ŭ jakaści žestu dobraj voli hatovy arhanizavać sustreču pradstaŭnikoŭ dyscyplinarnaha kamiteta MFCH z hienieralnym prakuroram Respubliki Biełaruś dla aznajamleńnia z vynikami praviedzienych pravieračnych mierapryjemstvaŭ u ramkach daśledčaj pravierki.
5. Biełaruski bok hatovy da dyjałohu jak z Łatvijaj, suarhanizataram čempijanatu, tak i ź lubymi inšymi krainami pa pytańniach najlepšaha praviadzieńnia sumiesnaha čempijanatu, a nie vykarystańnia jaho ŭ jakaści instrumienta palityčnaha cisku na našu krainu.
6. Uviazka praviadzieńnia čempijanatu sa źmienami Kanstytucyi, arhanizacyjaj niejkaha «dyjałohu» i inšymi ŭnutranymi pytańniami Biełarusi sama pa sabie absurdnaja.
Ale pakolki hetaja tema pastajanna ŭkidvajecca zvonku, biełaruski bok infarmuje, što realny praces hramadskaha dyjałohu ŭžo daŭno (z kastryčnika 2020 hoda) zapuščany ŭ vyhladzie stvoranych dyjałohavych placovak va ŭsich rehijonach krainy, padčas pracy jakich užo ŭniesiena kala 4,5 tys. prapanoŭ hramadzian, hramadskich arhanizacyj i kalektyvaŭ, a taksama bolš za 2 tys. prapanoŭ pastupiła ad hramadzian u hramadskija pryjomnyja pa roznych aśpiektach raźvićcia dziaržavy i hramadstva, i hety praces praciahvajecca.
U tym liku z ulikam hetych prapanoŭ na Usiebiełaruskim narodnym schodzie, jaki projdzie ŭ lutym 2021 hoda, delehatami buduć vypracoŭvacca kirunki hramadska-palityčnaha raźvićcia krainy, uklučajučy asnoŭnyja padychody da źmieny Kanstytucyi, jakija paśla mohuć być pryniatyja tolki samim biełaruskim narodam na refierendumie.
Biełaruskija ŭłady adkrytyja da luboha dyjałohu sa svaimi hramadzianami, jakija majuć roznyja pohlady jak na kanstytucyjnyja pytańni, tak i na lubyja inšyja aśpiekty, jakija tyčacca budučaha raźvićcia krainy, ale nie na kaleniach i nie va ŭmovach zamiežnaha cisku.
7. Arhanizacyjny kamitet pa praviadzieńni čempijanatu śvietu pa chakiei z šajbaj 2021 hoda raźličvaje, što MFCH budzie ćviorda prytrymlivacca pryncypaŭ alimpizmu, abjadnaŭčaj roli spartyŭnych spabornictvaŭ u intaresach usich amataraŭ hetaha jarkaha i mužnaha vidu sportu, a nie va ŭhodu ambicyjam palityčnych kanjunkturščykaŭ».
