Capkała adkazaŭ na pytańnie «Čyj Krym?» i prakamientavaŭ słovy Łukašenki ŭ svoj adras
Uviečary 4 červienia ŭ pasiołku Baraŭlany pad Minskam kala kramy «Hipa» źbirali podpisy za byłoha dyrektara PVT Valera Capkału, jaki vyrašyŭ balatavacca ŭ prezydenty. Čarhi kala stała ź imiem Capkały nie było, ale ludzi padychodzili adzin za adnym. Zborščyki skazali, što za 2 hadziny sabrali bolš za 40 podpisaŭ, i acanili aktyŭnaść budučych vybarcaŭ jak «dobruju», piša «Radyjo Svaboda».
Paśla da pikieta pryjšli Valer Capkała z žonkaj. Mierkavanaha kandydata sustreli apladysmentami i pačali zadavać jamu pytańni. Valer Capkała paviedamiŭ, što jahonyja aktyvisty na viečar aŭtorka sabrali 64 tysiačy podpisaŭ i jon upeŭnieny, što ahułam budzie sabrana značna bolš za sto tysiač. Potym Valer Capkała prapanavaŭ zadavać jamu pytańni.
Jaho adrazu spytali pra staŭleńnie da słovaŭ na jahony adras ad Alaksandra Łukašenki, jakija prahučali ŭ hety dzień. Pretendent u kandydaty skazaŭ, što «nia słuchaje ničoha» i miarkuje, što «tam nie było skazana cyvilizavana i pavažliva», «bo ŭ nas niama pavažlivaha staŭleńnia da apanentaŭ».
«Svaboda» paprasiła Valera Capkału prakamentavać dziejańni ŭładaŭ adnosna błohiera Cichanoŭskaha.
«Što kamentavać? Tut usim usio zrazumieła», — skazaŭ spadar Capkała.
«Ale ci pavieryli vy tamu, što ŭ Cichanoŭskaha byli 900 tysiač dalaraŭ?» — pierapytaŭ žurnalist.
«Pry čym tut maja viera? Davajcie nia budziem [apaviadać] kazku pra biełaha byčka. My ŭžo sfarmulavali dadzienaje pytańnie, i davajcie nia budziem na im spyniacca», — nastojvaŭ Valer Capkała.
Były dyrektar PVT nia staŭ kamentavać i toje, što Centravybarkam paličyŭ fejkam śviedčańni pra prymus hramadzian padpisvacca za Łukašenku, jakija sabraŭ Viktar Babaryka, i admoviŭ Babaryku ŭ zadavalnieńni skarhi. «Spytajcie pra heta ŭ CVK», — adkazaŭ Valer Capkała.
Na pytańnie, ci nie źbirajecca jon sam źviartacca z padobnymi skarhami, adkaz byŭ taki: «Vy ž viedajecie, jaki budzie vynik».
Voś niekatoryja tezy z vystupu Capkały pierad ludźmi, jakija sabralisia kala kramy «Hipa» ŭ Baraŭlanach.
- Treba, kab u biełarusaŭ byŭ vybar, jak u kramie.
- Heta nie jahonaja kraina, a naša. Treba adnaŭlać dyjaloh u hramadztvie.
- Ciapierašniaje kiraŭnictva Biełarusi pasvaryłasia jak z Zachadam, hetak i z Rasiejaj.
- Vyšejšaja ŭłada pavinna źmianiacca. Navat u Kitai ŭ kiraŭnictvie adbyvajecca ratacyja, a ŭ nas adzin čałaviek siadzić 26 hod i ŭsie vymušany jaho słuchać.
- Chaču, kab nie było nikoha vyšejšaha za zakon.
- Zarobki čynoŭnikaŭ treba pastavić u zaležnaść ad investycyj.
- Nam patrebna prafesijnaje vojska.
- Častku milicyi pavinien finansavać centralny biudžet, druhuju častku — miascovy.
- Treba skaracić padatki i pakinuć vialikuju častku miascovaj uładzie, jak u Polščy, dzie ŭ vakolicach Varšavy ŭžo nia viedajuć, kudy padzieć hrošy.
- Lustracyi niepatrebnyja, bolšaść čynoŭnikaŭ i siłavikoŭ, jakija ciapier słužać adnamu čałavieku, marać słužyć tolki narodu Biełarusi.
- Dekret ab darmajedach treba admianić, bo nielha karać ludziej, jakija trapili ŭ biadu, zastaŭšysia biaz pracy.
Na pytańnie «Čyj Krym?» Valer Capkała adkazaŭ, što biełarusy hetak ža lubiać ruskich, jak i ŭkraincaŭ, tamu Biełaruś pavinna być mostam, z dapamohaj jakoha Rasieja i Ukraina parazumiejucca.
U sustrečy z Valeram Capkałam brali ŭdzieł kala 100 čałaviek, milicyjantaŭ u formie pobač bačna nie było.
Čytajcie taksama:
Łukašenka pra Capkału: Kali budzie taki knyr, jak hety čałaviek, to miortvanarodžanyja buduć parasiaty
