U Stoŭbcach šmatlikija śmierci ad pnieŭmanij i karanavirusa. Raskazvajuć svajaki
U Stoŭbcach ludziej chavajuć u zakrytych trunach, raźvitvajucca tolki samyja blizkija svajaki. Fota radyjo «Svaboda».
U pačatku epidemii karanavirusa najbolš sumnych navin prychodziła ź Viciebska, potym — z Dokšyc i Biešankovičaŭ. Ciapier źjaviŭsia jašče adzin punkt, dzie situacyja vielmi napružanaja, — heta Stoŭbcy, horad za 65 kiłamietraŭ na paŭdniovy zachad ad Minska, nasielnictva — 17 tysiač čałaviek.
Balnica na 134 miescy pierapoŭnienaja ludźmi ź pnieŭmanijami i karanavirusam, častku chvorych adpraŭlajuć u inšyja harady. «Naša Niva» parazmaŭlała sa mnohimi žycharami Stoŭbcaŭ.
Čytajcie taksama: «Ź pnieŭmanijami adpraŭlajuć taksama ŭ Vałožyn, Słonim i Minsk». Deputat sa Stoŭbcaŭ raskazaŭ pra situacyju
«Miascovaja balnica zapoŭnienaja ŭžo dva tydni, — kaža miascovy žychar Mikałaj Łysionkaŭ. — Tolki adzin dzień vyzvaliłasia, kali zahadali vypisvać ludziej ź lohkimi simptomami, a nazaŭtra znoŭ zapoŭnili ludźmi».
Tolki za ŭčora pamierła minimum troje žycharoŭ horada. Usie jany žyli ŭ rajonie vulic Mičuryna i Kałhasnaj, tam ža raźmieščany rynak, a taksama Staŭbcoŭskaje RAUS.
Stanisłavu Marjanaŭnu Žaŭniarkievič pachavali siońnia. 10 krasavika, kali žančyna ŭžo lažała na aparacie štučnaj vientylacyi lohkich, joj spoŭniŭsia 71 hod.
«Kryŭdna toje, što našy piensijaniery internet nie čytajuć, a hladziać tolki «Panaramu», dzie ŭsio dobra, — kaža ziać pamierłaj Aleh. — Hrošaj, kažuć, niama ekanomiku spynić… Ale na Jeŭrapiejskija hulni hrošy jość, na «majbachi» jość. Nu nie spyniajecie vy, to pravodźcie choć tłumačalnuju pracu!
Ja braŭ daviedku ab śmierci cieščy. Zachodzić u toje pamiaškańnie žančyna, šukaje BTI, hadoŭ za 60. Ja kažu: čamu vy biez maski, biez palčatak? Nie chaču, u nas u krainie karancinu niama. I jak im što davieści».
Aleh kaža, što viarnuŭsia ŭ Biełaruś z Hiermanii 7 krasavika, ciešču ŭžo tady zabrali ŭ balnicu, jak i cieścia. Cieść, jakomu ciapier 74 hady, na lačeńni ŭ Vałožynie.
«Jon spačatku badziory byŭ, da vypiski rychtavaŭsia, a vo litaralna zaraz pazvaniŭ, što ŭ jaho nohi aciakajuć. Zabirajuć u reanimacyju. Jamu jašče ciažej budzie, bo ŭ jaho dyjabiet. Jon čałaviek kamunistyčnaha składu rozumu, u karanavirus nie vieryŭ. U kancy sakavika pajechaŭ u Minsk pa detali da skutara, nijak nie spynić było», — raskazvaje ziać.
Stanisłava Žaŭniarkievič pralažała na aparacie štučnaj vientylacyi lohkich dva tydni, na 15-y dzień jana pamierła. Ziać kaža, što jany hadajuć, adkul moh uziacca karanavirus. «Ci cieść ź Minska pryvioz, ci ŭ kaściole, ci ŭ balnicy… Da jaje 24 sakavika pryjechaŭ hiniekołah, bo daŭno ahlad nie prachodziła. I jana pajšła ŭ balnicu», — raskazvaje Aleh.
U paśviedčańni ab śmierci napisali «sardečnaja niedastatkovaść». «Ja kažu, dyk u jaje paćvierdžany karanavirus byŭ, a mnie adkazvajuć, što pamierła jana nie ad jaho, vo tak statystyka ŭ nas robicca», — kaža mužčyna.
Stanisłava Marjanaŭna adpracavała ŭsio žyćcio pradaŭcom. Raźvitvalisia ź joj u kaściole ŭ zakrytaj trunie, prysutničali tolki blizkija. «Ja raniej milicyjanieram pracavaŭ, šmat kaho viedaju. Šukaŭ ludziej, kab pamyli, pieraapranuli ciešču — usie admovilisia», — raskazvaje Aleh.
Pamior taksama 54-hadovy Aleh Bieć. Jon pracavaŭ inžynieram u miascovych elektrasietkach. Aficyjnaja pryčyna — pnieŭmanija. «Nakont [karana]virusa pakul dakładna nieviadoma», — skazaŭ «NN» jahony syn Pavieł.
Aleh Bieć. Fota ok.ru.
U sieradu pamior 83-hadovy Uładzimir Urubleŭski. Jon 29 hadoŭ uznačalvaŭ miascovy rajspažyŭsajuz, tamu ŭ horadzie byŭ davoli viadomaj asobaj. Jahonaja žonka Maryja Ivanaŭna nie chavaje śloz.
Uładzimir Urubleŭski razam z žonkaj. Fota ź siamiejnaha archiva.
«Jak hrom u jasnym niebie. Škada mnie jaho, 57 hadoŭ razam pražyli», — kaža žančyna. Niahledziačy na salidny ŭzrost, Uładzimir Urubleŭski byŭ krepkim mužčynam. Sačyŭ za svaim zdaroŭjem, dvojčy na hod płanava kłaŭsia ŭ balnicu, ni na što nie skardziŭsia. Vioŭ aktyŭny ład žyćcia, chadziŭ u łaźniu. Z chraničnych zachvorvańniaŭ mieŭ dyjabiet, a jašče zaraz lačyŭ sabie zuby.
«Nie čakali nijakaj biady. Jašče na katalicki Vialikdzień [12 krasavika — «NN»] siadzieli siamjoj za stałom, nikoha bolš nie było. A 14 krasavika jamu ŭžo kiepska stała, straciŭ prytomnaść. My niejak jaho adkačali. Dačka na mašynie ź Minska pryjechała, zabrała haspadara ŭ balnicu. Jana jakraz miedykam pracuje ŭ 1-j balnicy. A ŭžo adtul jaho ŭ čaćviortuju zabrali, dzie i pamior», — raskazvaje Maryja Ivanaŭna.
«U nas ža adzin dyjahnaz pišuć — «dvuchbakovaja pnieŭmanija». Ale karanavirus u jaho paćvierdžany byŭ. U mianie i dačka na jaho ŭžo pierachvareła, ale jaje ŭžo vypisali. U mianie brali test jašče ŭ piatnicu, ale vynikaŭ pakul niama. Heta ž pamierci ŭžo za taki čas možna, što za staŭleńnie da ludziej», — narakaje žančyna.
Pachavajuć Uładzimira Ivanaviča 24 krasavika. Truna budzie zakrytaj.
20 krasavika pamior 56-hadovy kiroŭca «Staŭbcyhaz» Ihar Šuka. Jaho špitalizavali 13 krasavika. Aficyjnaj pryčynaj śmierci nazyvajuć pnieŭmaniju. «Tak, my čuli takija razmovy», — kažuć na pradpryjemstvie na pytańnie, ci nie ad karanavirusa pamior mužčyna.
Pa infarmacyi «Našaj Nivy» dabraŭsia karanavirus i da miascovaj ułady. Špitalizavanaja namieśnica staršyni rajvykankama. Sakratarka skazała, što čynoŭnicy niama na pracoŭnym miescy i nieviadoma, kali budzie. Tym nie mienš, paśla dezynfiekcyi rajvykankam praciahvaje pracu.
Čamu ŭ nievialikim rajonnym centry stolki ludziej raptoŭna zachvareła na karanavirus? Miascovyja žychary kažuć pra chvoruju kanduktarku hramadskaha transpartu, jakaja, maŭlaŭ, mahła pazaražać haradžan. Ale paćvierdžańnia, što mienavita ŭ vyniku hetaha karanavirus tak masava raspaŭsiudziŭsia ŭ rajcentry, niama.
Čytajcie taksama: Kanduktarka ŭ Stoŭbcach zachvareła na karanavirus
Pachavańnie ŭ Stoŭbcach. Fota radyjo «Svaboda».
Kali vy chočacie padzialicca svajoj asabistaj historyjaj i raskazać toje, što važna viedać inšym, pišycie nam na [email protected] abo ŭ telehram pa spasyłcy tut nižej.
***
Tut prachodzić zbor srodkaŭ dla miedykaŭ horada Stoŭbcy.
