Biznesmien pryvioz karanavirus u Minsk. Praź jaho ŭ karancin trapili daktary «Łade», studenty BDU, vučni himnazii №20 i paračka tenisistaŭ
11 sakavika rabotnikaŭ pryvatnaha miedycynskaha centra «Łade» advieźli na karancin: da ich zavitaŭ pacyjent, jaki vyjaviŭsia chvorym na karanavirus. A na nastupny dzień u karancin masava zvozili ludziej z fakulteta mižnarodnych adnosinaŭ BDU: tam u adnaho sa studentaŭ taksama padazravali zachvorvańnie.
Miedycynski centr «Łade». Fota Nadziei Bužan
Sprava ŭ tym, što naviednik «Łade» — baćka taho samaha studenta BDU.
«Našaj Nivie» viadomyja imia i proźvišča hetaha čałavieka, ale zakanadaŭstva achoŭvaje miedycynskuju tajamnicu i tamu zabaraniaje ahučvać hetyja źviestki.
Heta bujny biznesmien, zasnavalnik i kiraŭnik šerahu kampanij u Rasii i Biełarusi. Jon viarnuŭsia z zamiežnaj pajezdki i nie pryznaŭsia, što naviedaŭ Italiju.
Pra heta raspavioŭ ministr achovy zdaroŭja Uładzimir Karanik:
«Pacyjent, jaki byŭ špitalizavany 9 sakavika ŭ Minsku ź pnieŭmanijaj, [znachodzicca] ŭ stanie siaredniaj stupieni ciažkaści.
Jon schavaŭ i ad nas, i ad supracoŭnikaŭ «Łade», što znachodziŭsia ŭ Paŭnočnaj Italii, bo prylacieŭ jon rejsam ź Miunchiena».
«Ź im razmaŭlali pa telefonie niadaŭna, ledź-ledź havaryŭ», — paviedamiŭ «Našaj Nivie» adzin sa znajomych biznesmiena.
Mužčynu stała kiepska prykładna 4 ci 5 sakavika. Špitalizavali jaho tolki 9 sakavika. Za hety čas jon mieŭ bolš za 90 čałaviek «pieršaha kantaktu».
A praz dva dni, 12 sakavika, pačałasia «masavaja evakuacyja» studentaŭ BDU. Pa słovach navučencaŭ, u karancin adpravili niekalki dziasiatkaŭ čałaviek, jakija mieli stasunki z druhakurśnikam fakulteta mižnarodnych adnosinaŭ. Hety druhakurśnik — syn taho samaha biznesmiena.
U vyniku špitalizavali i studenta, i jaho adnakurśnikaŭ, i žycharoŭ adnaho ź internataŭ BDU, u jakim žyli adnakurśniki studenta. Vučniaŭ vyvozili na mašynach chutkaj dapamohi. Ciapier ich čakaje karancin.
«Naša Niva» źviazałasia z tym samym studentam. Jon admoviŭsia ad kamientaroŭ, tolki koratka paviedamiŭ, što ź im nibyta ŭsio dobra.
Adnak adna ź siabrovak studenta ŭsio ž paśpieła zarazicca. Pra heta paviedamili pradstaŭniki Ministerstva achovy zdaroŭja na bryfinhu 13 sakavika.
Akramia taho, na karancinie jašče troje čałaviek. Ź imi biznesmien paśpieŭ pahulać u tenis jašče 2 sakavika.
«Da nas jon pryjšoŭ, kali adčuvaŭ siabie dobra. Razam z tryma partniorami pahulaŭ u tenis, paśla źjechaŭ. Dobra, što tady korty byli pustyja, a dziciačyja spabornictvy skončylisia hadziny na try raniej. Paśla jany nikudy nie zachodzili, adrazu raźjechalisia. Hetyja hości navat raździavalni zvyčajna nie naviedvajuć, pryjazdžajuć u formie. Dy i paśla my praviali dezynfiekcyju, tamu ciapier usio dakładna narmalna.
Ciapier na karancinie troje: adzin naš rabotnik i dvoje tych hulcoŭ. Ni ŭ kaho karanavirus nie paćvierdziŭsia, ale ich vyrašyli patrymać na karancinie dva tydni», — paviedamiŭ «Našaj Nivie» Samuił Kahan, kiraŭnik centra alimpijskaha reziervu pa tenisie.
Taksama adzin z kłasaŭ minskaj himnazii №20 pieraviali na chatniaje navučańnie. Pryčynaj znoŭ staŭ toj samy biznesmien — u kłasie vučycca jaho dačka.
Ni ŭ dziaŭčynki, ni ŭ jaje mamy karanavirus nie znajšli, jany znachodziacca ŭ karancinie.
«Paniki niama. Toj adzin kłas byŭ adpraŭleny na chatniaje navučańnie, ale z paniadziełka dzieci viernucca ŭ škołu. Dziaŭčynka, čyj baćka zachvareŭ, pakul što zastaniecca ŭ karancinie», — kažuć u škole.
Ci buduć biznesmiena pryciahvać da niejkaj adkaznaści? Śpiecyjalisty Ministerstva achovy zdaroŭja padčas bryfinhu zajavili, što pakul hałoŭnaje, kab jon vyzdaravieŭ. Adnak u lubym razie biełaruskaje zakanadaŭstva nie praduhledžvaje pakarańnie ŭ padobnych situacyjach.
Apytanka
Čytajcie taksama:
U izalacyi pad nahladam miedykaŭ znachodziacca 224 čałavieki z padazreńniem na karanavirus
U špitalach Biełarusi znachodzicca ŭžo 21 čałaviek z karanavirusam
Karanavirus: Šviecyja spyniaje poŭny ŭlik infikavanych i špitalizacyju maładych — zanadta doraha
