Łukašenka pra situacyju z karanavirusam u Biełarusi: Nam udałosia spakojna prajści hety pieryjad
Alaksandr Łukašenka ŭpeŭnieny, što dla paniki ŭ krainie z nahody situacyi z karanavirusam COVID-19 niama nijakich padstaŭ, paviedamlaje BIEŁTA.
Hetaja tema była na sustrečy kiraŭnika dziaržavy ź ministram achovy zdaroŭja Uładzimiram Karanikam. «Ja razumieju, što nam udałosia spakojna prajści hety pieryjad. Supakojvacca, viadoma, nielha. Ale i dla paniki ŭ nas niama nijakich padstaŭ», — padkreśliŭ biełaruski kiraŭnik.
Łukašenka adznačyŭ, što nie varta stvarać ažyjataž i skuplać roznaha rodu leki abo miedycynskija maski. «Pabiehli, skupili… I što ciapier? Ciapier zrazumieli, što pieranapružylisia», - zaŭvažyŭ kiraŭnik dziaržavy.
Łukašenka zajaviŭ, što zaraz miedycynskija maski ŭ Biełarusi vyrablajucca na niekalkich pradpryjemstvach u vialikaj kolkaści. «Sotni tysiač štuk u sutki. Niachaj kuplajuć, kali kamuści treba», — skazaŭ jon.
Alaksandr Łukašenka kanstatavaŭ, što ŭžo ŭsio zrazumieli z padačy Suśvietnaj arhanizacyi achovy zdaroŭja i daktaroŭ u śviecie, što masku varta nasić tolki zachvarełym, kab źnizić ryzyku zaražeńnia navakolnych. «Ale jość ludzi, jakija pierastrachavalisia, pačali hetyja maski i śpiecadzieńnie apranać. My nie piarečym. Tolki nie pavinna być niepatrebnych ruchaŭ cieła, nie pavinna być nijakaj paniki», — ličyć biełaruski lidar.
