U Maładziečnie internacyjanalny duet raspyliŭ haz u kramie i skraŭ usiu vyručku
Zdareńnie adbyłosia pozna ŭviečary: nieviadomyja pranikli ŭ kramu adzieńnia i abutku na vulicy Prytyckaha ŭ centry horada. Jany napali na rabotnika kramy, raspylili haz i skrali ź siejfa ŭsiu vyručku, paviedamlaje abłasnaja milicyja.
Śledča-apieratyŭnaja hrupa, što prybyła na miesca zdareńnia, vyśvietliła, što dvoje złamyśnikaŭ pranikli ŭ kramu praź niezamknionyja słužbovyja dźviery z tarca, pyrsnuli ŭ tvar hazam 21-hadovamu rabotniku i, skarystaŭšysia momantam, vykrali ź siejfa 3 250 rubloŭ, paśla čaho źbiehli.
Pry hetym, imavierna, kab navieści apieratyŭnikaŭ na niapravilny śled, skazali rabotniku pieradać dyrektaru «pryvitańnie ad tadžykaŭ».
Na vyšuk złačyncaŭ byli aryjentavany ŭsie supracoŭniki i narady milicyi. Zatrymać ich pa haračych śladach nie ŭdałosia, ale ich identyfikavali.
Adzin ź ich — biespracoŭny žychar Maładziečna, 26-hadovy hramadzianin Uźbiekistana. Jak vyśvietliłasia, mužčyna byŭ vydatna znajomy z dyrektaram kramy i nie raz byvaŭ u jaho, dobra aryjentavaŭsia ŭ pamiaškańni, viedaŭ, dzie raźmieščany siejf i klučy ad jaho, a taksama kolki tam hrošaj.
Tamu spłanavać złačynstva dla jaho akazałasia spravaj nieskładanaj, u pamočniki jon abraŭ sabie 21-hadovaha biespracoŭnaha žychara rajona. U abodvuch fihurantaŭ heta pieršy kryminalny vypadak u bijahrafii.
U chutkim časie apieratyŭniki zatrymali abodvuch padazravanych. Fihuranty nie stali admaŭlacca i pryznalisia ŭ zroblenym. Idealny, ź ich punktu hledžańnia, płan jany vynošvali niekalki dzion, pilna sočačy za rabotnikami kramy pa viečarach. Na złačynstva, pa słovach padazravanych, ich padšturchnuŭ niedachop hrošaj. Praŭda, jany raźličvali na dziasiatki tysiač rubloŭ, u siejfie było krychu bolš za 3000 rubloŭ.
Jak raspaviali sami saŭdzielniki, zdabyču jany padzialili i nakiravalisia «balavać» u stalicu. Častka vykradzienych hrošaj była kanfiskavana ŭ hramadzianina Uźbiekistana, astatnija jany ŭžo paśpieli patracić.
Asnoŭny fihurant aryštavany, u dačynieńni da jaho saŭdzielnika abranaja miera strymańnia ŭ vyhladzie padpiski ab niavyjeździe i naležnych pavodzinach.
