Noŭnejmy i Lidzija Jarmošyna: 19 najlepšych klipaŭ biełaruskich vykanaŭcaŭ u 2019 hodzie VIDEA
U pradstaŭnikoŭ ajčynnaj muzyki atrymaŭsia davoli ŭradžajny hod. Samyja cikavyja albomy (ich było niamała) možna znajści ŭ našych štomiesiačnych ahladach, a siońnia my sabrali top z 19 najlepšych, na naš pohlad, muzyčnych klipaŭ biełaruskich vykanaŭcaŭ.
19. ZOLKI BAND — Drevy i cieni
Hety klip bresckija muzyki pryśviacili svaim ziamlakam, jakija zmahalisia i zmahajucca suprać adkryćcia akumulatarnaha zavoda ŭ svaim horadzie.
Na praciahu klipa na adzieńnie hieroja prajecyrujujucca roznyja źjavy: błakitnaje nieba pieraŭtvarajecca ŭ navalničny niebaschił, a zamiest kvietak i raślin źjaŭlajucca ahoń, Jarmošyna, Marzaluk i kadry razhonaŭ apazicyjnych akcyj.
18. Raźbitaje Serca Pacana — Ženščyna chočet
(aściarožna, u klipie jość niecenzurnaja leksika)
U svaim novym klipie RSP raskazali pra toje, što moža adbycca, kali kryšačku pierabrać na Zybickaj: «Siońnia noč zarpłaty, siońnia ty satana», jak śpiavajecca.
Što cikava, dla zdymak hurt nie vykarystoŭvaŭ prafiesijnuju techniku — tolki smartfony i videarehistratary.
17. SiROP — Babočki
(aściarožna, u klipie jość niecenzurnaja leksika)
Były saksafanist «Lapisa Trubiackoha» Alaksiej Zahoryn bolš za 17 hod pravioŭ u turmie. Paśla apošniaj adsiedki Zahoryn vyrašyŭ pryśviacić siabie muzycy i staŭ «adzinym u Biełarusi hanhsta-repieram» pa mianušcy SiROP.
Pieśniu SiROP napisaŭ jakraz za kratami ŭ 2011 hodzie pad upłyvam dźviuch knih: «Turmy» Kinha i «Kalekcyjaniera» Faŭłza. Heta trek pra jaho samoha: uźloty i padzieńni, baraćba i sychod ad realnaści, amal što śmierć i poŭnaje pieraradžeńnie.
16. J:MORS — Nravitsia
Kali paśla prahladu papiaredniaha klipa ŭ vas pamienieła aptymizmu, to J:MORS viernie ŭ vas žadańnie žyć.
Uładzimir Puhač z pryhažuniaj jedzie ŭ kabryjalecie pa letnim Minsku, i hety videašerah pieramiažoŭvajecca kadrami z uśmieškami roznych ludziej. Elemientarna, ale vielmi pazityŭna.
15. Naviband — Halileo (Dva čiełovieka)
Davoli nietypovaja pieśnia dla hurta. Usio taja ž biaskoncaja luboŭ da žyćcia, ale krychu niazvykłaja aranžyroŭka.
Klip uražvaje svajoj minimalistyčnaj pryhažościu na fonie fantastyčnych piejzažaŭ.
14. Lavon Volski — Zima
Pabyli ŭ lecie, ciapier para viartacca ŭ našu biełaruskuju rečaisnaść.
Klip Lavona Volskaha — pra «krainu śvietłaha zaŭtra», dzie abiacali leta, ale zima zaciahnułasia na dziesiacihodździ.
13. Źmicier Vajciuškievič — Baju-baj
Kranalnyja vieršy Uładzimira Niaklajeva i piaščotnaja muzyka Źmitra Vajciuškieviča źlilisia ŭ čaroŭnuju pieśniu «Baju-baj», na jakuju vyjšaŭ vielmi ciopły animacyjny klip. U im muzyki i sam vykanaŭca vyjaŭlenyja śmiešnymi sabakami.
12. Lera Jaskievič — Proŝaj. Prosti
U Lery Jaskievič vydaŭsia vielmi nasyčany hod: vyjšaŭ pieršy debiutny albom, letam — mini-płytka na 6 piesień, a taksama para sinhłaŭ i niekalki klipaŭ.
Jak zaŭsiody, usio vielmi liryčna, ciopła i kranalna. Zdavałasia b, a jak jašče moža być u 20-hadovaj dziaŭčyny?
11. DREZDEN — Edielviejs
Klip na tytulny trek novaha alboma kalektyva Siarhieja Michałka, jak zaŭsiody, poŭny zahadak i schavanych sensaŭ. Heta apovied pra doŭhaje biaskoncaje viartańnie dadomu, imknieńnie, čakańnie i nadzieju jak najchutčej być sapraŭdnymi ŭ najlepšaj kampanii.
«Edelviejs» — historyja pra kaśmičnaje pryciahnieńnie pamiž suśvietami, što zaklučanyja ŭ čałaviečyja cieły, dzie Ziamla — pravadnik», — tak charaktaryzuje svaju pracu režysiorka Karalina Palakova.
10. Cima Biełaruskich — Vitaminka
Samaje papularnaje videa ŭ našym topie: na YouTube «Vitaminka» sabrała 75 miljonaŭ prahladaŭ. A Ukantakcie treki Cimy Biełaruskich sioleta prasłuchali bolš za 1 miljard razoŭ.
Vyhladaje davoli paciešna, kali klipy ŭ styli 90-ch zdymajuć ludzi, jakich u hety čas jašče nie było. Ad hetaha atrymlivajecca cikavy, ale krychu adnaboki pohlad na toj čas: kasietnyja mahnitafony, 8-bitnyja prystaŭki i pejdžary. Jašče i z rekłamnymi intehracyjami sučasnych praduktaŭ. Tamu tolki dziasiataje miesca.
9. Bakiej — Ja buntaŕ
(aściarožna, u klipie jość niecenzurnaja leksika)
Bakiej, jakomu zabaranili pajechać u tur pa Biełarusi praz «nizki mastacki ŭzrovień», sioleta źniaŭ iraničny klip pra žyćcio maładych repieraŭ, jakija bačać siabie buntarami, ale źjaŭlajucca takimi tolki ŭ svaich marach.
8. Weed & Dolphins — HIGH
Vy naŭrad ci čuli pra hety biełaruski hurt, ale Weed & Dolphins aktyŭna vystupajuć na jeŭrapiejskich kancertach i šoŭkiejsach.
Hałoŭnym hierojem psichadeličnaha klipa minčukoŭ źjaŭlajecca mikrafonny provad jak simvał usiaho žyćcia muzykaŭ: jak čornych momantaŭ, tak i najbolš paśpiachovych.
7. Dzieciuki — Kali nad łuham busieł pralacieŭ
Klip haradzienskich pankaŭ byŭ źniaty niamieckim režysioram Robiertam Ekštajnam, daŭnim siabram hurta, u nievialičkaj polskaj vioscy na biełaruska-litoŭskim pamiežžy.
Hałoŭnuju rolu ŭ videa vykanaŭ Piotryk Dudanovič, jaki arhanizoŭvaje kancerty «Dzieciukam» u Polščy.
6. ŁSP — Avtoplej
(aściarožna, u klipie jość niecenzurnaja leksika)
Jašče adzin animacyjny klip u našym topie.
Na jaho kadrach, akramia udzielnikaŭ hurta, možna pabačyć šmat znajomych tvaraŭ: Juryja Dudzia, Merylin Manro, baskietbolista Jaa Mina i navat žančynu, vielmi padobnuju da Lidzii Jarmošynaj.
5. NIZKIZ — Introviert
Klip źjaŭlajecca praciaham letašniaha videa na pieśniu «Lusterka», jakaja hučyć u pačatku videašerahu. Hałoŭnuju rolu ŭ abodvuch klipach hraje adzin i toj ža akcior — Anton Makucha.
Kali ŭ «Lusterku» hieroj sprabuje zazirnuć unutr siabie, kab razabracca, čaho tak paźbiahaje, to ŭ «Intraviercie» jon chavaje siabie ad astatnich na svajoj ułasnaj płaniecie.
4. Zui — Papu uvolili
Zui — heta sumiesny prajekt muzykaŭ hurtoŭ «NahUal» i «ili-ili». Sam hurt nazyvaje svajo videa «trejleram da niaźniataha mastackaha filma z 80-ch».
Jak by toje ni było, u videa vielmi tonka pieradadziena atmaśfiera dziciačaha nierazumieńnia darosłych prablem i sprobaŭ u ich razabracca.
3. Molchat Doma — Tancievať
Pra Molchat Doma čaściej za ŭsio kažuć u kantekście ich jeŭrapiejskich pośpiechaŭ, jakija miažujuć z tym, što «pra hety hurt nichto nie viedaje ŭ ich na radzimie».
Klip na trek «Tancievať» źniała ispanskaja režysiorka Izabel Padzilja, jakaja adkryła dla siabie hurt jakraz praz YouTube. Hałoŭny hieroj videa — małady vampir, što davoli dziŭna i nijak nie vynikaje z tekstu pieśni. Ale tak pabačyła aŭtarka.
2. Maks Korž — Šantaž
Jašče adno videa sa šmatmiljonnymi prahladami — siońnia bolš za 18 z pałovaj miljonaŭ.
«Šantaž» — heta niešta kštałtu trochchvilinnaha karotkamietražnaha filma pra dvajnoje žyćcio siamiejnaj pary, jakaja spałučaje vobraz «paśpiachovaha siemjanina» i viečary z paluboŭnikami. I jak paluboŭniki karystajucca hetym.
1. Pietla Pristrastija — Prksbłnnst
(aściarožna, u klipie jość niecenzurnaja leksika)
Vielmi mocny klip, jakija raspaviadaje pra historyju pustelnika, jaki źbieh z horada sa šmatpaviarchovymi hmachami i hihanckimi trubami TEC. Adnojčy jon znachodzić u śniezie źmierzłaje, ale jašče žyvoje ptušania. I tut u jahonym žyćci źjaŭlajecca choć niejki sens.
Ci zmoža jon vyratavać ptušku i što budzie paśla — adkazy možna znajści ŭ videa, jakoje my pryznajem najlepšym u hetym hodzie.
