Urad zaćvierdziŭ pieralik stratehična značnych dla ekanomiki Biełarusi AAT
Zaćvierdžany pieralik adkrytych akcyjaniernych tavarystvaŭ, što zabiaśpiečvajuć funkcyjanavańnie stratehična značnych halin ekanomiki i «inšyja važnyja dziaržaŭnyja patrebnaści», paviedamiła pres‑słužba ŭrada.
Takoje rašeńnie pryniataje pastanovaj Savieta ministraŭ № 1927 ad 15 śniežnia 2008 hoda, jakoje ŭstupiła ŭ siłu zadnim čysłom — z 17 lipienia 2008 hoda.
U pieralik uvajšli 162 pradpryjemstvy, u tym liku ŭ Minbudarchitektury — 8, Minpramie — 11, Minsielhascharčy — 40, Minenierha — 8, kancernach «Biełdziaržcharčpram» — 15, «Biełnaftachim» — 9, «Biellehpram» — 14, «Biellespapierapram» — 3. Taksama adznačany stratehična značnyja pradpryjemstva ŭ Bresckaj vobłaści — 9, u Viciebskaj — 14, Homielskaj — 6, Hrodzienskaj — 6, Minskaj — 9, Mahiloŭskaj — 6, u Minsku — 4.
U pieralik, u pryvatnaści, uvajšli AAT «Biarozabudmateryjały», «Kieramin» (Minsk), «Biełkard» (Hrodna), «Minski padšypnikavy zavod», «Haryzont», «Kamunarka», biełaruska‑rasijskaje sumiesnaje pradpryjemstva «Bresthazaaparat», «Krynica», «Mazyrsol», «Elema» i inš.
Dadzienaja pastanova ŭrada pryniataja ŭ adpaviednaści z dekretam № 7 ad 14 krasavika 2008 hoda, jaki pastupova admianiaje abmiežavańni na abaračeńnie ŭ Biełarusi akcyj adkrytych akcyjaniernych tavarystvaŭ, stvoranych u pracesie raździaržaŭleńnia i pryvatyzacyi, adčužeńnie jakich raniej było zamarožana.
Na pieršym etapie (z 17 lipienia 2008 hoda) admieniena abmiežavańnie na adčužeńnie akcyj tavarystvaŭ, u statutnych fondach jakich dola dziaržavy abo adsutničaje naohuł, abo składaje 75% i bolš. Taksama poŭnaściu admianiajecca zabarona na adčužeńnie akcyj akcyjaniernych tavarystvaŭ, što ažyćciaŭlajuć pierapracoŭku sielskahaspadarčaj pradukcyi, pieradadzienych sielhasvytvorcam, i pradpryjemstvaŭ chlebapraduktaŭ.
Na druhim etapie (z 1 studzienia 2009 hoda) buduć admienieny abmiežavańni na adčužeńnie akcyj akcyjaniernych tavarystvaŭ z dolaj dziaržavy zvyš 50%. Pry hetym na pieršym i druhim etapach admiena abmiežavańniaŭ nie raspaŭsiudžvajecca na akcyi akcyjaniernych tavarystvaŭ, što zabiaśpiečvajuć funkcyjanavańnie stratehična značnych halin ekanomiki. Pieralik takich AAT i zaćvierdžany ciapier pastanovaj urada № 1927. Na trecim etapie (z 1 studzienia 2011 hoda) usie abmiežavańni buduć poŭnaściu admienienyja.
