Volha Havarcova: «Mahčyma, bavić čas z unukam Michaiłu Zacharavu nie dazvalaje jaho vysoki sacyjalny status?!»
Viadomaja biełaruskaja tenisistka Volha Havarcova raspaviała pra niaprostyja adnosiny z hałoŭnym trenieram «Junactva» Michaiłam Zacharavym, jaki źjaŭlajecca baćkam jaje muža Kanstancina.
Fota: Volha Šukajła, SPORT.TUT.BY
— Volha, raskažycie pra syna.
— Daminik — jaho imia.
— Ekzatyčnaje.
— Tak, ciapier nazirajecca tendencyja, kali baćki dajuć dzieciam jeŭrapiejskija imiony. Spadziajusia, syn budzie šmat padarožničać, a internacyjanalnaje imia dapamoža jamu chutčej asvoicca, dzie b jon ni apynuŭsia.
— Jak vy łaskava nazyvajecie syna?
— Domi, ale čaściej za ŭsio vykarystoŭvaju poŭnaje imia. 14 žniŭnia Daminiku spoŭniłasia šeść miesiacaŭ. Ja atrymlivaju asałodu ad maciarynstva i radujusia, jak i lubaja maładaja mama, uśmiešcy svajho małoha i sprobam niešta skazać. Razam z tym ciapier taki pieryjad, što z-za dohladu maleńkaha dziciaci praktyčna ni na što inšaje času nie zastajecca. A bolš za ŭsio chočacca vyspacca! Šmat dapamahaje maja mama Taćciana, niekalki razoŭ prychodziła mama Kanstancina Raisa Mikałajeŭna.
U nas spakojny mały, adnak jaho pastajanna treba trymać na rukach. Biez padtrymki svajoj mamy treniravacca i rychtavacca da ŭdziełu ŭ adkrytym čempijanacie ZŠA ja nie zmahła b.
— Jaki Kanstancin baćka?
— Dobra spraŭlajecca z rolaj. Jon vialiki małajčyna!
— Jak vy paznajomilisia? Miarkujučy pa vašym tvitary, chadzić na matčy minskaha «Junactva», za jakoje Kanstancin vystupaŭ, vy pačali ŭ 2017 hodzie.
— Paśla letašniaha adkrytaha čempijanatu Aŭstralii ja była try tydni ŭ Minsku, rychtavalisia razam z žanočaj zbornaj pa tenisie da našaha pieršaha za piać hadoŭ chatniaha matča ŭ Kubku Fiederacyi suprać Niderłandaŭ. Zbory prachodzili ŭ «Čyžoŭka-arenie», chatniaj placoŭcy dla «Junactva». Tak vyjšła, što tenisistki i chakieisty treniravalisia ŭ adnym miescy. Tak i adbyłasia naša sustreča z Kanstancinam. Viadoma, zavočna my i raniej adno adnaho viedali, ale nikoli nie pierasiakalisia. Nu raz pavitalisia, ja jaho zaprasiła na našu hulniu. Jon mianie paklikaŭ na svaju hulniu. Kali ŭ Kości zaviaršyŭsia siezon, jon jeździŭ sa mnoj na ŭsie turniry: «Rałan Haros», adkryty čempijanat Charvatyi i Uimbłdon.
— Čamu vy syšlisia?
— Mahčyma, kali znachodziš svajho čałavieka, usio atrymlivajecca samo saboj. Kali ž sprabuješ niešta spłanavać, ničoha nie vychodzić.
— Čaho vy čakali ad «svajho čałavieka»?
— Dla mianie važna, kab unutry joknuła. A taksama — dasiahnuć ŭnutranaha stanu, kali ty adčuvaješ siabie spakojna pobač z kachanym čałaviekam i kali niama adčuvańnia, byccam ty robiš niešta niapravilna.
— Pieršaje «Bentli» Michaił Zacharaŭ kupiŭ svajmu synu Kanstancinu. A jaki samy darahi padarunak jon zrabiŭ vam?
— Pa słovach Kanstancina, Michał Michajłavič sam sabie padaryŭ «Bentli» za hanarary Kanstancina, jakija toj atrymlivaŭ, vystupajučy ŭ Paŭnočnaj Amierycy z 2004-ha pa 2007-y hady, bieź viedama Kości. Bolš padrabiazna muž pry žadańni raskaža sam. Nakolki mnie viadoma, hetaja situacyja imkliva raźvivajecca.
— Na vas zaručalny piarścionak…
— … z dyjamientam! Canu nazyvać nie budu. A z nahody naradžeńnia syna Kanstancina padaryŭ mnie zavušnicy z dyjamientami.
Family ❤️ pic.twitter.com/CFvHokjRfp
— Pryhožyja mužčynskija ŭčynki. Ź jakoha momantu vy nazyvajecie Kanstancina mužam?
— My pabralisia šlubam u kastryčniku 2017-ha. Hrandyjoznaje śviata nie ładzili, baćkoŭ u zahs nie klikali. Zaraz taki čas, što kali nie vystaviŭ fota ŭ sacsietkach, jak byccam ničoha i nie było. U toj ža čas usio čaściej sustrakajucca vypadki, kali pary ładziać cyrymanijalny viasielle praź niekalki hadoŭ paśla naradžeńnia dziaciej. Niechta płanuje z takoj nahody arhanizavany vyjezd haściej za miažu. Pahladzim, moža, praz paru hadoŭ, kali padraście syn, my tak i zrobim.
— Jaki dzied Michaił Michajłavič?
— Jon jašče nie bačyŭ unuka. Kali Naradziŭsia Daminik, jon napisaŭ mnie adno SMS-paviedamleńnie. Razumieju, što my z Kościem, majoj mamaj i synam da apošniaha času znachodzilisia ŭ ZŠA. Potym try tydni praviali ŭ Minsku i znoŭ źjechali ŭ ZŠA, adnak, pakul byli doma, z boku Michaiła Michajłaviča ŭvahi nie było. Mahčyma, zrabić pieršy krok i bavić čas z unukam Michaiłu Michajłaviču nie dazvalaje, jak jon sam ličyć, jaho vysoki sacyjalny status, a naša siamja nie daciahvaje da jaho ŭzroŭniu?!
— Vas heta zasmučaje?
— Sa słoŭ Kości viedaju, što ŭ Michaiła Michajłaviča składanyja adnosiny z synami. Z Sašam jon naohuł kantaktuje vielmi redka z-za peŭnych pryčyn. I z Kościem u jaho vielmi niaprostyja adnosiny. Dumaju, navošta jamu unuk, kali jon nie moža zładzić z synami?