Hierainia dnia: dziaŭčyna, jakaja na hetaj Alimpijadzie ŭziała zołata ŭ roznych vidach sportu FOTAFAKT
Ester Ledecka z Čechii vyjhrała ŭ Pchiončchanie zołata adrazu ŭ dźviuch dyscyplinach: u supierhihanckim słałamie i ŭ snaŭbordzie.
Fota lidovky.cz.
Češskaja snaŭbardystka Ester Ledecka ŭ minułuju subotu źjaviłasia ŭ startavym stvory trasy supierhihanckaha słałamu. Heta było histaryčnaj padziejaj: nichto ŭ historyi Alimpijad nie spaborničaŭ paralelna i ŭ łyžach, i ŭ snaŭbordzie.
Na Ledeckaj byli łyžy, jakija zabrakavała amierykanskaja supierzorka Mikaeła Šyfryn. Spartoŭki supracoŭničali z adnym i tym ža pastaŭščykom ekipiroŭki, ale prava pieršaha vybaru było ŭ Šyfryn. Praz chvilinu i 21,11 siekundy paśla startu Ledecka ŭziała zołata. I nichto ničoha nie zrazumieŭ.
Da momantu startu Ledeckaj na trasie adkatali ŭsie top-spartoŭcy, i Hanna Fajt z Aŭstryi ŭžo śviatkavała pieramohu.
«Ja praŭda nie zrazumieła, što adbyłosia, — kazała Ledecka. — Dumała, što na tabło niejkaja pamyłka i što čas ciapier pieraklučać na inšych. Hladzieła na svaju mamu, i my abiedźvie ničoha nie razumieli. Imavierna, ja tut była adzinaj snaŭbardystkaj. Usie astatnija dziaŭčaty nie nadta ryzykavali. Na ich cisnuła adkaznaść, ja ž prosta pasprabavała zrabić usio mahčymaje».
Ledecka paśla pieramohi pryjšła na pres-kanfierencyju ŭ hihanckich akularach, bo nie paśpieła nafarbavacca.
Roŭna praz tydzień Ester uziała zołata i ŭ snaŭbordzie, pakazaŭšy najlepšy vynik u paralelnym hihanckim słałamie. Jana stała pieršaj spartoŭkaj, jakaja pieramahła na Alimpijadzie ŭ roznych vidach sportu.
Dla taho, kab padtrymlivać navyki i ŭ łyžach, i ŭ snaŭbordzie, Ledecka trenirujecca pa śpiecyjalnaj schiemie.
«U nas jość trenirovačnyja błoki, — raspaviadaŭ The Guardian jaje trenier Tomas Bank. — Try tydni łyžy, try tydni snaŭbord. Naprykład, my try tydni katajemsia na łyžach u Čyli, potym viartajemsia ŭ Jeŭropu i zajmajemsia snaŭbordam».
Sočym za Alimpijadaj razam z bukmiekierskaj kantoraj Marafon
