Rasijski viadučy ANT Illa Kołasaŭ syšoŭ z kanała — jamu nie praciahnuli kantrakt. Taksama ŭ kadry pamienšała Bandarenki
Jak stała viadoma «Našaj Nivie», z ANT kančatkova syšoŭ rasijski viadučy Illa Kołasaŭ, jaki rabiŭ na kanale z 2015 hoda, pierajšoŭšy tudy z rasijskaha RTVi.
Kołasavu prosta nie praciahnuli kantrakt, na ANT jon vioŭ «Kontury». Za čas raboty ŭ Biełarusi Kołasaŭ adznačyŭsia tym, što praciahnuŭ supracoŭničać z rasijskim kanałam.
Sychod Kołasava z kanała supaŭ pa časie z prychodam na ANT Marata Markava i Dźmitryja Bačkova z BT.
Z raździeła «Tvary ANT» na sajcie telekampanii taksama źnikli asobnyja viadučyja, jakija raniej časta źjaŭlalisia ŭ kadry: Aleh Lepiešankoŭ, Viačasłaŭ Bandarenka, Alaksiej Michalčanka.
Jak nam stała viadoma, jany pa-raniejšamu pracujuć na kanale, ale efirnaha času ŭ ich pamienieła: tak, Bandarenka skazaŭ nam, što ciapier maje tolki rubryku ŭ «Našaj ranicy».
Prahramy Michalčanki «Jak jość, tak jość» u efiry taksama niama — ciapier jon zajmajecca vizualnym afarmleńniem siužetaŭ. A voś Lepiešankoŭ «zaniaty ŭ inšych prajektach».
Taksama nahadajem, što z kanała niadaŭna syšoŭ Vadzim Hihin — jon pierajšoŭ na kanał «Biełros», jaki faktyčna niemahčyma ŭbačyć u Biełarusi.