Kijeŭ pra ryzyki supolnych biełaruska-rasijskich vučeńniaŭ: Rasija rychtujecca da «vialikaj vajny» z Zachadam
Pad vyhladam stratehičnych kamandna-štabnych vučeńniaŭ «Zachad-2017» u Biełarusi Rasijskaja Fiederacyja moža stvaryć udarnyja hrupoŭki vojskaŭ dla pierachodu dziaržaŭnaj miažy i vajennaha ŭvarvańnia va Ukrainu, zajaviŭ sakratar Savieta nacbiaśpieki i abarony Ukrainy Alaksandr Turčynaŭ.
Jon nahadaŭ, što za apošnija hady padobnyja vučeńni nieadnarazova vykarystoŭvalisia Rasijaj dla dasiahnieńnia schavanych vajenna-palityčnych metaŭ.
U pryvatnaści, Turčynaŭ ŭspomniŭ vučeńni «Kaŭkaz-2008», kali rasijskija vojski pryciahvalisia da manieŭraŭ i nie viarnulisia z palihonaŭ u punkty pastajannaj dysłakacyi, pačaŭšy ŭzbrojenuju ahresiju suprać Hruzii.
Padčas vučeńniaŭ «Kaŭkaz-2012» i «Kaŭkaz-2016» byli adpracavany mahčymyja varyjanty prymianieńnia hrupovak rasiejskich vojskaŭ i viadzieńnia bajavych dziejańniaŭ na Paŭdniova-Zachodnim stratehičnym kirunku, u tym liku suprać sił NATA.
Taksama vučeńni VS RF i Biełarusi «Zachad-2013» stali placoŭkaj dla adpracoŭki scenaryjaŭ uzbrojenaj ahresii suprać Ukrainy, jakija Kreml u ahulnych rysach pasprabavaŭ realizavać u 2014—2015 hadach.
Padčas vučeńniaŭ «Centr-2015» pad prykryćciom była stvorana ŭdarnaja hrupoŭka avijacyi dla prymianieńnia ŭ Siryi.
Pad vyhladam biaśpieki praviadzieńnia Zimovych alimpijskich hulniaŭ u Sočy u lutym 2014 hoda Rasija razharnuła hrupoŭki vojskaŭ dla praviadzieńnia śpiecyjalnaj apieracyi pa akupacyi Kryma.