Makiej na Źjeździe biełarusaŭ śvietu: Davajcie kiravacca łohikaj karparacyi
15 lipienia ŭ Minsku adkryŭsia siomy Źjezd biełarusaŭ śvietu. Na jaho źjechalisia biełarusy dyjaspary bolš čym z 20 krain. Taki forum adbyvajecca raz na čatyry hady.
Ad uładaŭ sioleta udzielnikaŭ vitaŭ ministr zamiežnych spraŭ Biełarusi Uładzimir Makiej. Na papiarednich forumach, jak praviła, ź vitalnym słovam vystupaŭ ministr kultury. Zrešty, na pačatku 90-ch na źjezdy prychodziŭ kiraŭnik dziaržavy.
Siarod prysutnych u zale — pieršy kiraŭnik niezaležnaj Biełarusi Stanisłaŭ Šuškievič, paet Anatol Viarcinski, prafiesar Leanid Łyč, historyk Uładzimir Arłoŭ, palityk Pavieł Sieviaryniec, lehiendarny ściahanosiec Nina Bahinskaja i mnohija-mnohija inšyja.
Maderuje sioletniuju sustreču deputat Alena Anisim.
Pieršym uziaŭ słova Radzim Harecki, jaki vosiem hadoŭ źjaŭlaŭsia prezidentam Zhurtavańnia biełarusaŭ śvietu «Baćkaŭščyna». Jon nahadaŭ, što 2017 hod bahaty na značnyja jubilei. Dalej udzielnikaŭ vitali kiraŭnik MHA «ZBS «Baćkaŭščyna» Alena Makoŭskaja i staršynia Rady Nina Šydłoŭskaja.
Kiraŭnik MHA «ZBS «Baćkaŭščyna» Alena Makoŭskaja i staršynia Rady Nina Šydłoŭskaja.
Adnym ź pieršych na źjeździe vystupiŭ ministr zamiežnych spraŭ Uładzimir Makiej.
Vystup Uładzimira Makieja vyklikaŭ abmierkavańni ŭ sacyjalnych sietkach.
«Dla mianie vialiki honar i zadavalnieńnie vystupać na najbujniejšym, važnym dla našaj krainy forumie, jaki sabraŭ udzielnikaŭ z bolš čym 20 dziaržaŭ śvietu — pačaŭ pramovu jon. — Tak stałasia, što my z vami žyviom siońnia ŭ roznych dziaržavach, u roznych kulturnych asiarodździach. Ale jość toje, što abjadnoŭvaje ŭsich nas. Toje, što źjaŭlajecca niabačnaj, ale vielmi tryvałaj poviaźziu. Heta luboŭ da Biełarusi, da jaje kultury, tradycyj, duchoŭnaj spadčyny».
Makiej niekalki razoŭ padčas vystupu padkreśliŭ svaju ŭdziačnaść udzielnikam schodu za toje, što biełaruskija tradycyi stali hučać macniej.
«U apošnija hady ŭ Biełarusi adradzilisia tradycyi biełaruskaj vyšyvanki. Jaje arnamienty — heta simvały miru, dabra, zhody, što zaŭsiody było hałoŭnym dla biełarusaŭ. I vydatna, što hetyja tradycyi znachodziać hłyboki vodhuk u našaj moładzi. Ź vialikim entuzijazmam padtrymlivajucca biełarusami zamiežža. Viedajecie, što vielmi važna dla našaj dziaržavy… Naradziłasia ŭžo niekalki pakaleńniaŭ, jakija žyvuć u samastojnaj, niezaležnaj dziaržavie. U ich svaje pohlady na žyćcio, svajo razumieńnie budučyni našaj krainy. Ale toje, što bolš za 70 adsotkaŭ padtrymlivajuć isnavańnie samastojnaj niezaležnaj dziaržavy, chočuć žyć u samastojnaj niezaležnaj dziaržavie — heta mnohaje značyć».
Jon dadaŭ, što Minsk hatovy być pieramoŭnaj placoŭkaj, i što tolki zhurtavanaść i salidarnaść mohuć praduchilić raźvićcio dalejšaj kanfrantacyi ŭ śviecie.
Makiej ahučyŭ, što prykładna 3-4 miljony biełarusaŭ ciapier žyvuć za miažoj. Na jaho dumku, heta miakkaja, ale mahutnaja vielizarnaja siła, jakaja hetak ža moža spryjać umacavańniu i roskvitu Biełarusi.
«My ŭsie roznyja. Ja zhodny sa spadaryniaj Šydłoŭskaj, jakaja taksama źviarnuła na heta ŭvahu. U kožnaha z nas svoj pohlad na žyćcio krainy. I ja liču heta narmalnym. Ja nie zaklikaju vas śpiavać paniehiryki ŭładzie, uschvalać kahości ci štości. U hetym vy možacie vyznačycca sami. Ale kožny z nas moža štości zrabić dziela našaj hałoŭnaj mety — umacavańnia niezaležnaści našaj dziaržavy. Heta patrabuje ad nas abjadnańnia pierad źniešnimi i ŭnutranymi vyklikami».
Ministr adznačyŭ, što razam biełarusy mohuć zrabić dla krainy mnohaje.
«My pavinny raźvivać našu kulturu, raźvivać movu, našy tradycyi. My pavinny źviarnuć uvahu na viartańnie kulturnych kaštoŭnaściaŭ. My možam šmat što zrabić u ekanomicy, u palitycy, abjektyŭna raskazvać pra toje, što adbyvajecca ŭ našym rehijonie», — skazaŭ Makiej.
Naprykancy pramovy ministr źviarnuŭsia da budučyni krainy.
«Što tyčycca taho, jak my pavinny žyć dalej, jak kraina pavinna raźvivacca dalej. Znoŭ ža, u kožnaha svoj pohlad. Ale ja tut zhodny sa Śviatłanaj Aleksijevič, jakaja adnojčy skazała, što, napeŭna, dosyć vojnaŭ, dosyć revalucyj. My pavinny zrabić usio, kab naša kraina raźvivałasia evalucyjnym šlacham. Łohika kanfrantacyi pavinna adyści ŭ minułaje. My pavinny kiravacca łohikaj karparacyi. My pavinny ad mientalitetu supraćstajańnia pierajści da mientalitetu partniorstva. Inšaha šlachu niama».
