U Biełastoku prezientavali muzyčny śpiektakl «Narodny albom. 20 hod»
U Biełastoku da 20-hodździa «Narodnaha albomu» prezientavali muzyčny śpiektakl pavodle kampazicyj z kružełki, jakaja stałasia lehiendarnaju.
Lavon Volski pry mikrafonie na 20-hodździ «Narodnaha albomu»
Pačynalniki i novyja siły
U Padlaskaj opiery ŭ Biełastoku vystupili 6 vykanaŭcaŭ, jakija brali ŭdzieł u mienskaj premjery «Narodnaha albomu» 20 hadoŭ tamu: Lavon Volski, Kasia Kamockaja, Źmicier Vajciuškievič, Vieranika Kruhłova, Alaksandr Pamidoraŭ i Siarhiej Achramovič. Artystaŭ pieršaha składu padtrymali inšyja muzyki dy dva biełaruskija hurty: «Apple Tea» i «Aquarelle Quartet».
Scena Padlaskaj opiery była abstalavanaja ŭ vyhladzie miestačkovaj karčmy na byłym polska-savieckim pamiežžy. Usie artysty hrali ludziej, jakija apynulisia ŭ hetym miescy pierad samym pačatkam II suśvietnaj vajny. Hetak pierad hledačami źjavilisia kantrabandysty, špijony, nastaŭnik Rahojša, studentka z Varšavy Alicyja, prychilnik «Polščy ad mora da mora» Kazik Piasecki, pracaŭnik piłaramy Juzik, jaki «čakaje rasiejskija tanki», i hetak dalej.
Bolšaść hetych vobrazaŭ i teksty adpaviednych piesień prydumaŭ stvaralnik kancepcyi «Narodnaha albomu» Michał Aniempadystaŭ. Pryčym jahonyja idei ŭźnikli całkam samastojna — biez upłyvu ramanaŭ Siarhieja Piaseckaha, jaki ŭ svaich tvorach padrabiazna apisaŭ mižvajennaje žyćcio ŭ Rakavie — «stalicy avanturnikaŭ i kantrabandystaŭ» na polska-savieckaj miažy.
Scenahrafija stvarała atmaśfieru karčmy na polska-savieckim pamiežžy pierad II suśvietnaj vajnoj
Nastupny śpiektakl u Rakavie?
Udzielnik «Narodnaha albomu» Źmicier Vajciuškievič adznačyŭ, što kožny muzyka z prajektu maryŭ by prezientavać śpiektakl u Biełarusi, ale heta niemahčyma pakul zrabić praz «čornyja śpisy».
«Chaciełasia b vystupić raniej, a nie praz 10 hadoŭ na čarhovym jubilei. Heta hańba, kali biełaruskija artysty, jakija zrabili značnyja ŭnioski dla ŭsioj biełaruskaj kultury, niezaležnaj, a časam i aficyjnaj, nie mohuć vystupać u svajoj krainie», — padkreśliŭ muzyka.
Lavon Volski zaznačyŭ, što pamiežža, pra jakoje raspaviadaje «Narodny albom», — heta ŭsia Biełaruś.
«Kultura pamiežža — heta, na žal, kultura vajny i prychodu tych ci inšych, i źviazanaja z hetym pamiarkoŭnaść miascovych žycharoŭ. Niekatoryja pamiežžy zrabili z hetaha niejki kult. My pakul nie zdoleli, ale ja dumaju, u nas heta ŭrešcie atrymajecca, bo ciapierašniaje pamiežža vyhadnaje — spryjaje handlu i turyzmu».
Lavon Volski padkreśliŭ, što vielmi chacieŭ by, kab nastupny śpiektakl pavodle «Narodnaha albomu» adbyŭsia ŭ Rakavie.
Lavon Volski ŭ vobrazie polskaha špijona
U čakańni čarhovaha šou
Staršynia hramadskaj inicyjatyvy «Volnaja Biełaruś», jakaja dzieje ŭ Varšavie, Jaŭhien Cichanovič padkreśliŭ: «Kožny ź biełarusaŭ, peŭna, viedaje «Narodny albom» zdaŭna. Ja jaho mieŭ u svaim kampjutary, ale pieśni tam nie byli naležnym čynam padpisanyja. Ja siońnia ŭpieršyniu pasłuchaŭ pieśni ŭ takim paradku, u jakim jany pradstaŭlenyja ŭ aryhinale. Było kalarova, cikava, cudoŭna. Ja čakaju čarhovaha šou».
Eks-kandydat na prezidenctva, były palitviazień Uładzimir Niaklajeŭ zaŭvažyŭ, što ŭzrušany paśla śpiektaklu. «Siońnia na tak zvanaj biełaruskaj estradzie, dzie nie zrazumieješ chto jakimi hałasami śpiavaje, panuje papsa, pryčym zusim nie našaja, rasiejskaja, haściavaja bracija typu Ały Puhačovaj ci Filipa Kirkorava. Muzyki z «Narodnaha albomu» — pryhožyja, talenavityja. Jany pavinny na siońniašni dzień vyznačać biełaruskuju masavuju kulturu, jany pavinny być tvarami našaj krainy, a zusim nie tyja ludzi, jakich pryznačajuć ułady».
«Treba sprabavać pastavić śpiektakl u Biełarusi»
Dyrektar telekanału «Biełsat» Ahnieška Ramašeŭskaja-Huzy raspaviała, što premjera «Narodnaha alboma. 20 hod» była vialikaj pravierkaj dla niezaležnaha telekanału.
«Spadarynia ministr, jakaja była na śpiektakli, zapytałasia: jakaja teatralnaja trupa ŭdzielničała ŭ imprezie? Ja adkazała, što my sami sfarmavali kalektyŭ, pryčym musili heta zrabić ciaham 2 miesiacaŭ. Ministr tolki šyroka adkryła vočy. Ale heta varta było zrabić. Ja baču pazityŭny vodhuk ad ludziej i heta vielmi dobraja ŭznaharoda», — skazała spadarynia Ramašeŭskaja-Huzy.
Pavodle mierkavańnia dyrektara «Biełsatu», na muzyčny śpiektakl pavodle «Narodnaha albomu» ŭ biełaruskaj stalicy pryjšło b blizu 10 tys. čałaviek. «Ja dumaju, što treba sprabavać pastavić śpiektakl u Miensku. A čamu nie? Ci tut jość niešta palityčnaje?» — adznačyła spadarynia Ramašeŭskaja-Huzy.
Na jaje dumku, nielha adryvać prajekt ad hledačoŭ, dziela jakich jon byŭ stvorany. «Narodny albom» paŭstaŭ pieradusim dla biełarusaŭ i maje dla ich asablivaje značeńnie, pierakananaja dyrektar niezaležnaha telekanału.
Źmicier Vajciuškievič
«Znoŭ pierakanaŭsia, što žyvie Biełaruś»
Pieršy kiraŭnik niezaležnaj Biełarusi i eks-staršynia Viarchoŭnaha Savietu Biełarusi Stanisłaŭ Šuškievič adznačyŭ: «Narodny albom» — cudoŭny śpiektakl, heta tvorčaść volnych i talenavitych ludziej, jakija lubiać Biełaruś. Hety śpiektakl pryvivaje luboŭ da Biełarusi. Ja jaho naviedaŭ i znoŭ pierakanaŭsia, što Biełaruś žyvie. A ŭ našaj dziaržavie možna stavić pakul toje, što adpaviadaje pryncypu: žyvie našaje paddanstva Rasiei. Mnie vielmi padabajecca, što muzyki z «Narodnaha albomu» zachaplajuć moładź. Dziakuj im za heta».
«Pieśnia z «Narodnaha albomu» mahła b stać himnam»
Pavodle eks-kandydata na prezidenctva, byłoha palitviaźnia Mikałaja Statkieviča, stvaralniki «Narodnaha albomu» — sapraŭdnyja hieroi, jakija dbali pra zachavańnie biełaruskaj kultury va ŭmovach hanieńniaŭ.
«Narodny albom» — šykoŭny prajekt, jaki robić honar luboj krainie. Moj nizki pakłon hetym ludziam i vialikaja ŭdziačnaść «Biełsatu» za hety cudoŭny padarunak, adpačynak dla serca», — skazaŭ spadar Statkievič.
Adna ź jahonych ulubionych piesień — «Kraj, ty moj kraj», dzie jość słovy: «My ŭ šerych mundurach, pad šerym kryvickim niebam, pierad navałaj z Uschodu — staniem muram kamiennym…»
«Ja dumaju, hetaja pieśnia mahła b być himnam tych, chto zmahajecca za našuju krainu. Hetyja słovy ciapier robiacca znoŭ aktualnymi. Pucin viadzie palityku niby ź pieršaj pałovy minułaha stahodździa. Dla nas, mahčyma, rychtujecca scenar 1940-ha hoda dla krainaŭ Bałtyi: spačatku izalujuć, potym biaruć za horła i prapanujuć bazy, a potym, abapirajučysia na bazy, daterminovyja vybary abo refierendum. Heta ŭsio ŭžo prachodzili, jany ciapier sprabujuć heta paŭtaryć. Ciapier sapraŭdy dla Biełarusi isnuje vialikaja pahroza z Uschodu. A tvorčaść, pieśni natchniajuć, stvarajuć emocyi, žadańnie zmahacca. Hetym jany nieacennyja», — miarkuje były palitviazień.
Alaksandr Pamidoraŭ
«Narodny albom» — apovied pra historyju dvuch narodaŭ
Deputat Siejmu Polščy Robert Tyškievič, jaki prysutničaŭ na śpiektakli, padkreśliŭ: «Narodny albom» raspaviadaje pra palakaŭ i biełarusaŭ, jakija žyvuć razam. Heta apovied pra spadčynu daŭniaj Rečy Paspalitaj, jakoj užo niama. Padlašša — minijaciura Rečy Paspalitaj abodvuch narodaŭ, mnohich kultur, kanfiesijaŭ, movaŭ. Hety prajekt tut asabliva dobra hučyć i znachodzić tut, na maju dumku, naturalny klimat i naturalnuju scenahrafiju».
Deputat vykazaŭ nadzieju, što «Narodny albom» nie apošni raz byŭ pakazany ŭ Biełastoku.
Bolš fota tut >>>
