Raśsielhasnahlad abmiežavaŭ pastaŭki ź jašče čatyroch biełaruskich pradpryjemstvaŭ
Fiederalnaja słužba pa vieterynarnym i fitasanitarnym nahladzie (Raśsielhasnahlad) z 18 žniŭnia ŭvodzić časovyja abmiežavańni na pastaŭki ŭ Rasiju pradukcyi čatyroch biełaruskich pradpryjemstvaŭ — STAA «Biełsyr», TAA «Bijakam», HP «Małočny haściniec» i AAT «Połacki małočny kambinat».
Jak paviedamlaje pres-słužba Raśsielhasnahlada, abmiežavańni ŭvodziacca «ŭ suviazi z vyjaŭlenymi hrubymi parušeńniami pry pieramiaščeńni tavaraŭ z terytoryi Respubliki Biełaruś na terytoryju Rasijskaj Fiederacyi, a taksama parušeńniami vieterynarna-sanitarnych patrabavańniaŭ i normaŭ Jeŭrazijskaha ekanamičnaha sajuza».
Adznačajecca taksama, što pytańnie admieny časovych abmiežavańniaŭ budzie razhledžanaje Raśsielhasnahladam «paśla praviadzieńnia biełaruskim bokam rasśledavańnia pa faktach vyjaŭlenych parušeńniaŭ, pradastaŭleńnia ŭ adras rasijskaha viedamstva jaho vynikaŭ z prykładańniem adpaviednych materyjałaŭ, a taksama ich analizu śpiecyjalistami Raśsielhasnahlada».
U vypadku niepryniaćcia nieadkładnych mier, nakiravanych na vyklučeńnie padobnych vypadkaŭ, Raśsielhasnahlad pakidaje za saboj prava ŭvieści časovyja abmiežavańni na pastaŭki pradukcyi pradpryjemstvaŭ, u dačynieńni da jakich vyjaŭlajucca sistematyčnyja parušeńni pry praviadzieńni dakumientalnaha kantrolu.
«U vypadku praciahu vyjaŭleńnia pradukcyi, nieadpaviednaj vieterynarna-sanitarnym normam i patrabavańniam Jeŭrazijskaha ekanamičnaha sajuza, isnuje vierahodnaść abmiežavańnia pastavak u Rasijskuju Fiederacyju pradukcyi, jakaja pastupaje z šerahu pradpryjemstvaŭ Respubliki Biełaruś», — havorycca ŭ paviedamleńni rasijskaha viedamstva.
Padkreślivajecca taksama, što Raśsielhasnahladam u 2016 hodzie ŭ časovych kantrolnych vieterynarnych punktach pry praviadzieńni dakumientalnaha kantrolu vyjaŭlena 181 parušeńnie, ź jakich 124 (68%) heta parušeńni dapuščanyja supracoŭnikami dziaržaŭnaj vieterynarnaj słužby Respubliki Biełaruś pry siertyfikacyi pradukcyi.
Nahadajem, z 13 žniŭnia ŭžo dziejničaje zabarona na pastaŭki pradukcyi troch biełaruskich małočnych pradpryjemstvaŭ: vaŭkavyskaha AAT «Biełłakt», AAT «Rahačoŭski małočna-kansiervavy kambinat» i PUP «Kalinkavicki małočny kambinat».
Kamientujučy hetaje rašeńnie, pres-słužba Ministerstva sielskaj haspadarki i charčavańnia Biełarusi adznačała, što pretenzii Raśsielhasnahlada datyčacca jakaści afarmleńnia dekłaracyj adpaviednaści na suchoje małako.
«Pretenzii, jakija jość u Raśsielhasnahlada, datyčacca jakaści afarmleńnia dekłaracyj adpaviednaści na suchoje małako, — rastłumačyŭ namieśnik ministra, dyrektar departamienta vieterynarnaha i charčovaha nahladu Alaksandr Subocin. — My raźbirajemsia ŭ situacyi. Budziem pracavać nad tym, kab źniać usie isnujučyja pytańni dla adnaŭleńnia pastavak našaj pradukcyi na rasijski rynak».