Čynoŭnik Minkultury: Film «Krepaść» da pakazu płanuje «Kinavideaprakat» Minharvykankama
«Naša Niva» paviedamlała, što ŭ Rasii źniali dziciačy mulcik «Krepaść». U im pakazvajucca padziei abłohi Smalenska ŭ 1609—1611 hadach. Akcenty rastaŭlenyja vyrazna: «dobryja» — heta maskoŭcy, a kiepskija — vojska Rečy Paspalitaj pad kiraŭnictvam Žyhimonta III Vazy.
Vojski Rečy Paspalitaj u mulciku nazyvajucca «padstupnymi palakami», jakija prahnuć zachapić «Ruś».
Viadoma taksama, što «Krepaść» miarkujecca da pakazu i ŭ Biełarusi. Choć Reč Paspalitaja była dziaržavaj palakaŭ, biełarusaŭ i litoŭcaŭ, i našy prodki vajavali za toje, kab Smalensk zastaŭsia ŭ składzie Vialikaha Kniastva Litoŭskaha.
Ci miesca takomu mulciku na našych ekranach?
«Naša Niva» patelefanavała ŭ Ministerstva kultury, kab spytać ich mierkavańnie. My pahutaryli z hałoŭnym śpiecyjalistam upraŭleńnia pa kiniematahrafii Ministerstva kultury Michaiłam Drazdovym.
«NN»: Michał Alaksiejevič, ci nie zdajecca vam, što hety mulcik nie varta pakazvać u Biełarusi? Usio ž, našym dzieciam prapanoŭvajuć hladzieć, jak hinuć ich «padstupnyja» prodki…
Michaił Drazdoŭ: U internecie ŭsialakaje pišuć. Kali jon da nas pryjdzie, kali my pahladzim… Uvohule, kožny aŭtar maje prava na svaju pazicyju.
«NN»: A takaja pazicyja nie padajecca Vam niedapuščalnaj z punktu hledžańnia biełarusaŭ?
Michaił Drazdoŭ: Jaho hladzieć treba. Voś byvaje tak, što vychodzić film 14+, jaho jašče nidzie nie bačyli, a hramadzianie ŭžo pišuć, što tam parnahrafija dziciačaja moža być. Ludzi pilnyja ŭ nas. I my pa fakcie pracujem. Kali tam nie budzie ničoha takoha, to chaj idzie.
«NN»: Mulcik, u jakim zabivajuć našych prodkaŭ, heta ničoha takoha?
Michaił Drazdoŭ: Prodkaŭ zabivajuć… U internecie ŭsio, što papała pišuć. Inšy raz čytaju… Mo jon nie źniaty jašče.
«NN»: «Krepaść» jość u płanach pakazu, jaki vykładzienyja ŭ internecie. Toje, što jon źniaty, nie vyklikaje sumnievu.
Michaił Drazdoŭ: Tak, jaho źbirajucca pakazvać z 29 kastryčnika…
«NN»: Vy dali dabro?
Michaił Drazdoŭ: Nu jak ja daŭ dabro? Ja nie bačyŭ jašče filma, dakumientaŭ. Mnie voś kinaprakat daŭ śpis płanavanych da pakazu filmaŭ, mo jany sami jaho jašče nie bačyli.
«NN»: Dyk kali vy budziecie hladzieć?
Michaił Drazdoŭ: Nu, 29-ha i pahladzim.
«NN»: Kali jon užo vyjdzie, tady i pahladzicie? Jak tak?
Michaił Drazdoŭ: Nu tak. Raniej jaho nie pahladziš…
«NN»: U sensie, kali jon vam nie spadabajecca, to vy jaho ŭsio ž zdymiecie?
Michaił Drazdoŭ: Ja nie hatovy adkazać, hetyja pytańni treba było zadavać kinaprakatu.
«NN»: U vas jość paŭnamoctvy spynić pakaz?
Michaił Drazdoŭ: Niama ŭ nas. My možam tolki zabaranić film, kali tam zakliki da zrynańnia isnujučaha ładu…
«NN»: Jašče jakija kryteryi?
Michaił Drazdoŭ: Kali tam jość niejkija sceny… Nu, rasavyja, rasa, razumiejecie? Rasavaja varožaść. Elemienty prapahandy parnahrafii tam…
«NN»: A biełarusafobstva — heta nie pryčyna?
Michaił Drazdoŭ: Nu kali tam budzie rasčlanieńnie trupaŭ, razumiejecie? Jašče heta moža być respublikanskaja ekśpiertnaja kamisija pa praduchileńni hvałtu i žorstkaści. Kali jość takija sceny, to jana moža nie raić hety film da pakazu ŭ kino.
«NN»: Karaciej, kali naša historyja i našy prodki pakazvajucca ŭ niehatyŭnym śviatle, to heta nie źjaŭlajecca padstavaju dla skasavańnia pakazu?
Michaił Drazdoŭ: Razumiejecie, ja nie mahu vam adkazać na hetaje pytańnie. Tamu što hety film spačatku treba było pahladzieć.
«NN»: Jość trejler i siužet. Davajcie vy ich pahladzicie, i ja vam praz 10 chvilin nabiaru? Paśla 29 kastryčnika budzie pozna.
Michaił Drazdoŭ: Nie budu ja hladzieć, u mianie na heta času niama. Dy ŭ mianie jašče i dakumientaŭ niama. Mnie dali tolki takuju namiotku, što hety film płanujecca da pakazu. Voś, ja hladžu — 29 kastryčnika. Jašče raz kažu. A ŭ nas siońnia tolki 30 vieraśnia. Mo jaho jašče zdymuć z prakatu. I ŭvohule, heta nie da mianie, ja drobny čynoŭnik, jaki dziejničaje na padstavie damovaŭ, dziaržaŭnaha prakatnaha paśviedčańnia. Kali ŭ vas jość zaściarohi, to pišycie na imia ministra.
Film da pakazu płanuje UP «Kinavideaprakat» Minharvykankama. Jany jeździać na kinarynki, hladziać hetyja filmy. Mianie ž prosta potym infarmujuć, što voś heta i heta zapłanavana. Chacia, sumniajusia, moža, jak i vy, tolki trejlery hladziać, i… Treba hlanuć sam film.
Histaryčnaja daviedka: Maskoŭskija vojski zachapili Smalensk u 1514 hodzie, u vyniku čaho jon amal na sto hadoŭ vyjšaŭ z-pad kantrolu VKŁ. Jon viarnuŭsia ŭ skład Rečy Paspalitaj u vyniku vajny 1609—1611 hadoŭ. Siarod inšych, siłami VKŁ u abjadnanym vojsku Rečy Paspalitaj kiravaŭ vybitny dziaržaŭny dziejač Leŭ Sapieha.