«Ražanyja» kidajucca ličbami: u Ciareščanki — 135, va Ułachoviča — 87
Da kanca zboru podpisaŭ dla vyłučeńnia kandydataŭ u prezidenty zastajecca adzin tydzień. Inicyjatyŭnyja hrupy pretendentaŭ štodnia nazyvajuć novyja ličby, demanstrujučy psichałahičnuju pieravahu nad apanientami.
Kolkaść podpisaŭ za Alaksandra Łukašenku ahučvajecca nierehularna, pavodle apošnich paviedamleńniaŭ, da kanca tydnia jana musiła pieravysić 1 miljon.
Ekanamist Viktar Ciareščanka sprabuje zamacavać za saboj pieršaje miesca siarod kandydataŭ, jakija nie krytykujuć ciapierašniaha kiraŭnika krainy. Štab Ciareščanki dekłaruje, što naniatyja studenty sabrali 135 tysiač podpisaŭ. Apošnija dni kolkaść pavialičvajecca rekordnymi tempami. Apietyt prychodzić padčas ježy — kiraŭnik inicyjatyŭnaj hrupy zamachvajecca na 250 tysiač hałasoŭ.
Siarhiej Hajdukievič nie vieryć svaim apanientam, jakija nabrali patrebnuju kolkaść podpisaŭ. Zatoje sam dekłaruje, što 100 tysiač u jaho ŭžo ŭ kišeni.
Vyrašyła nie adstavać i Taćciana Karatkievič. Jana taksama pierakonvaje, što nabrała 100 tysiač podpisaŭ.
Płan-hrafik atamana Mikałaja Ułachoviča pakazvaje, što na 13 žniŭnia jon nabraŭ 87 tysiač hałasoŭ. «U nas u adroźnieńnie ad inšych jość strohi płan-hrafik, jakim my kirujemsia», — patłumačyŭ kiraŭnik jahonaha štaba Michaił Obrazaŭ.
Kolkaść podpisaŭ u padtrymku Anatola Labiedźku vyrasła samymi chutkimi tempami. Kiraŭnik jaho vybarčaha štabu Leŭ Marholin raskazaŭ «Radyjo Svaboda» pra 70 tysiač podpisaŭ, prytym što try dni tamu nazyvałasia kala 50 tysiač.
Narešcie, Siarhiej Kalakin abnaŭlaje dadzienyja pa subotach. Tamu na dadzieny momant štab ukazvaje ličbu minułaha tydnia — 64 tysiačy čałaviek.
