Płatnyja stamatołahi: sistema nakrutki i padmanu. Žurnalisckaje rasśledavańnie
Žurnalist Ej.by vybraŭ 10 klinik roznaj katehoryi, paśla čaho adzin čałaviek z adnymi i tymi ž zubami prajšoŭ va ŭsich abśledavańnie. Vynik atrymaŭsia žachlivym. U bolšaści ź ich vyznačyli dla lačeńnia roznyja zuby. I kali ŭ «Umkamiedzie» — tolki adzin, to ŭ «Ekamiedservisie» — cełych 6.
Jak nie stać achviaraj banalnaha razvodu? Jakija kliniki padmanvajuć pacyjentaŭ, a jakija pracujuć sumlenna? Nijakaj tałkovaj sistemy dziaržaŭnaha kantrolu nie isnuje.
Ceny na płatnuju miedycynu ŭ Biełarusi kusajucca. I kali, naprykład, prajści płatnaje abśledavańnie UHD možna całkam spakojna, bo maješ vidavočny vynik, to z zubami sprava zusim inšaja.
Pacyjentu mohuć bieź nieabchodnaści pralačyć i try, i piać, i navat siem zuboŭ.
Pry hetym šancaŭ dakazać, što ŭsie jany ci, pa mienšaj miery, pałova ź ich byli zusim zdarovyja, niama nijakich. U takoj situacyi pacyjenty płatnych stamatałahičnych klinik vymušanyja ślepa vieryć doktaru, spadziejučysia na jaho prystojnaść. Adnak kali havorka idzie pra hrošy, niekatoryja daktary zasoŭvajuć svaju prystojnaść dalej. Bo ich zarpłata zaležyć ad vyručki.
Jak zrazumieć, u jakich klinikach i jakija daktary pracujuć sumlenna, a ŭ jakich — banalna razvodziać pacyjentaŭ na hrošy? My prydumali ŭłasnuju schiemu, jakaja ź vialikaj dolaj imaviernaści dapamoža adkazać na hetaje niaprostaje pytańnie.
Ideja praviadzieńnia žurnalisckaha rasśledavańnia źjaviłasia paśla taho, jak u adnu pryvatnuju kliniku źviarnuŭsia supracoŭnik redakcyi, u jakoha zabaleŭ zub. Dla vyjaŭleńnia chvoraha zuba doktaru spatrebiłasia kala 15 chvilin, bo chitry karyjes prabraŭsia pamiž zubami i byŭ całkam nieprykmietny. Pry hetym lekarka ahledzieła ŭsie zuby i kanstatavała, što jany zdarovyja i što dzirak nidzie niama. Paśla vyjaŭleńnia dziravaha zuba pačałosia jaho lačeńnie. U chodzie lačeńnia vyśvietliłasia, što susiedni zub taksama pažadana padlačyć, bo karyjes zakranuŭ i jaho. Na pieršy i druhi zub spatrebiłasia dva vizity da lekara i kala 300 dalaraŭ.
Kali doktarka ŭziałasia za druhi zub, to spačatku pastaviła časovuju płombu i paprasiła pryjści praź dzień, kab pravieści kančatkovaje lačeńnie. I voś tut i pačałosia. Doktarka nie adrazu ŭzhadała pacyjenta i pačała paŭtorny ahlad usich zuboŭ, jaki pravodziła ŭsiaho try dni tamu. I kali raniej jana nie vyjaviła ni adnoj dzirki, to tut raptam… vyjaviła adrazu try.
I tolki kali jana dajšła da časovaj płomby, to ŭspomniła, chto da jaje pryjšoŭ, pačyrvanieła, sumiełasia i skazała, što ciapier dalečyć hety zub, a hetyja try dzirki možna saniravać paźniej, praz paŭhoda. Tut i ŭźnikli padazreńni ab niesumlennaści. I my vyrašyli pravieści vialiki ekśpierymient. Sutnaść jaho takaja.
My vybrali 10 klinik roznaj katehoryi, paśla čaho adzin čałaviek z adnymi i tymi ž zubami prajšoŭ va ŭsich abśledavańnie. Vynik akazaŭsia žachlivy.
Adrazu chočacca skazać, što my nie znajšli ni adnaho lekara, jaki vyklikaŭ by ŭ nas niepryjaznaść abo niedavier. Heta byli spres miłyja ludzi. Pytańni vyklikali mienavita vyniki ich abśledavańnia.
Ekśpierymient nahadaŭ hulniu ŭ «marski boj»: chtości trapiŭ, a niechta vidavočna streliŭ mima. My nie robim u rasśledavańni niejkich vysnoŭ, a prosta damo vam vyniki ekśpierymientu.
«Umkabiełmied»
Mienš za ŭsio chvorych zuboŭ vyjavili ŭ maleńkaj pryvatnaj stamatałahičnaj klinicy «Umkabiełmied». Usiaho adzin zub.
Užo praz 40 siekund nas adpuścili: «Treba lačyć zub 16. Mahčyma, jašče nie zdarovy zub 26, nie mahu skazać. Zrabicie zdymak». Ułasna, i ŭsio.
Respublikanski kliničny miedycynski centr Kiraŭnictva spravaŭ prezidenta
Na druhim miescy pa kolkaści vyjaŭlenych zuboŭ akazałasia dziaržustanova — miedycynski centr Kiraŭnictva spravaŭ prezidenta.
Pry zapisie pa telefonie rehistratar papiaredžvaje: źjavicca na pryjom nieabchodna jak minimum za paŭhadziny. Spačatku było niezrazumieła, navošta tak rana prychodzić, ale zatym karcina prajaśniłasia. U centr, kali idziacie ŭ pieršy raz, lepš prychodzić navat na hadzinu raniej.
Klinika UDP ŭjaŭlaje saboj łabirynt: niekalki budynkaŭ ź niezrazumiełaj płaniroŭkaj. Na dźviarach — strohaja abjava, jakaja paviedamlaje, što ŭvachod na terytoryju «prezidenckaj» kliniki biez propusku zabaronieny. Adnak, jak heta časta byvaje ŭ ciapierašniaj Biełarusi, jana nie niasie nijakaha sensu.
Achoŭnik nijakich dakumientaŭ nie patrabuje i z uśmieškaj prapuskaje naviedvalnikaŭ praz turnikiet. Navošta ž u takim vypadku achova? Adkaz prychodzić chutka. Jon pakazvaje darohu i tłumačać, dzie harderob, kudy iści spačatku, kudy adpravicca potym.
Adrazu možna skazać, što doktar z Respublikanskaha kliničnaha miedycynskaha centra Kiraŭnictva spravaŭ prezidenta vidavočna nie stavić pierad saboj metu ździerci z pacyjenta jak maha bolš hrošaj. Jana znachodzić paru chvorych zuboŭ i sprabuje daviedacca, chto ich lačyŭ raniej. Rekamienduje viarnucca da papiaredniaha doktara, spasyłajučysia na toje, što toj stamatołah ździejśniŭ pamyłku padčas lačeńnia, a značyć, pavinien jaje vypravić biaspłatna. Paśla abśledavańnia daje zašyfravany list i adpraŭlaje płacić za pasłuhu.
Apłata — vielmi praciahły i pracajomki praces. Dla hetaha treba viarnucca ŭ hałaŭny budynak kliniki.
Dla pačatku davodzicca adstajać čarhu pierad kabinietam afarmleńnia miedycynskich kartak, dzie vyrablajuć rasšyfroŭku i zaklučajuć dahavor. Čakańnie źjadaje kala 50 chvilin času.
Na hetym pryhody nie skančajucca. Majučy na rukach dakumienty, treba jašče adstajać nastupnuju čarhu — na hety raz u kasu dla apłaty. I navat heta jašče nie ŭsio!
Dalej nieabchodna viarnucca da lekara z paćviardžeńniem apłaty — praz tyja ž katakomby. U vyniku dziela piacichvilinnaha ahladu ŭ stamatołaha tracim bolš za dźvie hadziny, a bo da płatnych stamatołahaŭ iduć u tym liku i dziela ekanomii času.
Tut varta adrazu adznačyć, što vynik abśledavańnia ŭ klinicy častkova supaŭ z abśledavańniem va «Umkabiełmied». Abodva doktary pakazali na chvory zub 16.
«Łade»
Na trecim miescy pa kolkaści vyjaŭlenych chvorych zuboŭ akazaŭsia viadomy miedycynski centr «Łade».
Stamatołah sucha pieraličyŭ niezdarovyja, na jaho pohlad, zuby i z pačućciem vykananaha doŭhu pahladzieŭ na dźviery, namiakajučy, što nam para. My ž zapytali kansultatyŭnaje zaklučeńnie.
Na prośbu lekar adkazaŭ ździŭleńniem i nierazumieńniem. Chvilin piać jon chadziŭ pa kabinietach u pošuku arkušyka, na jakim možna zrabić zapis — piśmovymi kansultatyŭnymi vysnovami doktar vidavočna nie raskidvajecca. U vyniku atrymlivajem zapis na firmiennym błanku, ale biez proźvišča doktara: ni štampa, ni podpisu jon nie pakidaje. Bolš za toje, jon navat nie traplaje ŭ hrafu «dyjahnaz» — piša vidavočna ad bałdy, choć dakładnaść heta nie tolki vietlivaść karaloŭ, ale i aŭtarytet stamatołaha.
Dva niezdarovyja zuby ŭ nas znachodzić lekar «Łade».
Varta adznačyć, što zub 17 supaŭ z vynikam abśledavańnia ŭ klinicy KSP. Adnak kali ŭ pieršym vypadku doktar dla dakładnaha dyjahnazu parekamiendavaŭ zrabić zdymak, to ŭ druhim stamatołah «Łade» kateharyčna skazaŭ «lačyć».
Minskaja abłasnaja stamatałahičnaja paliklinika
Čaćviortaje miesca pa kolkaści dakładna chvorych zuboŭ zaniała dziaržaŭnaja miedustanova — Minskaja abłasnaja stamatałahičnaja paliklinika, jakaja taksama akazvaje pasłuhi pa płatnym lačeńni zuboŭ.
Dla taho kab zapisacca na płatny pryjom, paspračacca z rehistrataram pa telefonie davodzicca dvojčy. Z kamunikacyjaj tut vidavočnyja prablemy.
Pieršy raz rehistratar kaža: «Dy vy ŭvohule viedajecie, na kali ŭ nas bližejšy zapis?!» Paśla nastojvańnia z našaha boku (jak akazałasia, pryjom stomatołahaŭ-terapieŭtaŭ raśpisany na paru tydniaŭ napierad) i paśla zhody pačakać, rehistratar hrebliva paviedamlaje: «Vy naohuł u kursie, što ceny ŭ nas nie nizkija?! Zvyčajna 300 tysiač, ale byvaje i 600, i navat 700 tysiač!».
Pryhožy jarki sajt dadzienaj palikliniki vymaloŭvaje ŭ dumkach pacyjenta budynak jak minimum z akuratnym ramontam. Adnak rečaisnaść akazvajecca sumnaj.
Miaški ź niezrazumiełym źmiestam «upryhožvajuć» uvachod.
Rehistratura — jak z typovaj savieckaj palikliniki: doŭhaja čarha, niavietły rabotnik, poŭnaja adsutnaść cikavaści da pacyjentaŭ. Z-za čarhi ŭ rehistraturu my spaźniajemsia na 10 chvilin, ale nichto hetaha nie zaŭvažaje — mabyć, pacyjentaŭ pastajanna zatrymlivajuć na etapie afarmleńnia.
Stan płatnaha kabinieta zasmučaje: dobra, kali ramont tut rabili choć by hadoŭ 5 tamu. Pracujuć u im adrazu niekalki lekaraŭ, tamu pry ŭvachodzie nazirajem niekalkich pacyjentaŭ z raziaŭlenymi ratami i ŭjaŭlajem, što ŭžo praz chvilinu apyniemsia ŭ takim ža stanoviščy pry dziasiatku nieznajomych ludziej.
Doktar, da jakoha my traplajem na pryjom, — pryjemnaja akuratnaja dziaŭčyna. Jana prapanuje adrazu ž palačyć zuby, adnak, pačuŭšy našu niaŭpeŭnienaść u tym, što chopić hrošaj, spytała: « A kolki jość?».
Try chvoryja zuby znajšli ŭ nas u Minskaj abłasnoj stamatałahičnaj paliklinicy.
Z hetych troch zuboŭ adzin (16) supaŭ adrazu z dvuma papiarednimi vynikami abśledavańniaŭ (klinika KSP i «UmkaBiełMied»), a inšy (27) — z dyjahnazam «Łade». Ale źjaviŭsia i pieršy siurpryz — 38 zub, jaki raniej nikim nie vyjaŭlaŭsia. Adnak heta byli prosta kvietački, pierad tym, što budzie ŭ inšych klinikach.
«Kravira»
Adrazu try centry pakazali poŭnaje supadzieńnie vynikaŭ kansultacyi, vyjaviŭšy pa try adnolkavyja prablemnyja zuby.
Pry hetym miedycynski centr «Kravira» praciahvaje tradycyju bujnych miedcentraŭ nie prymać pacyjentaŭ svoječasova. Praŭda, doktar trojčy paprasiŭ prabačeńnia.
Vynik «Kraviry» — try chvoryja zuby.
Pry hetym idzie poŭnaje supadzieńnie pa dvuch zubach (17 i 27) z «Łade», a pa 38-m zubie ź Minskaj abłasnoj paliklinikaj.
«Bieły nasaroh»
U «Biełym nasarohu» doktar viadzie siabie ŭvažliva: niahledziačy na natoŭp u kalidory, nie śpiašajecca, nie razdražniajecca i spakojna robić svaju pracu. Dalej sam vydaje zaklučeńnie — biez prośby z našaha boku. Vynik — na dumku «Biełaha nasaroha», nieabchodna lačyć try zuby.
Vyniki całkam supali z vynikami «Kraviry».
«Nardzin»
Jak i ŭ papiarednim vypadku, rańni prychod na pryjom nie maje sensu. Lekar u pryznačany čas nie vychodzić, i my z sumam na praciahu 10 chvilin vymušanyja hladzieć u sumnyja dźviery.
Tym nie mienš, ahlad pravodzić z zacikaŭlenaściu. Lekar spakojna adkazvaje na ŭsie pytańni. Vyklikaje simpatyju, a taksama žadańnie viarnucca.
Atrymlivajem zaklučeńnie: lekar «Nardzin» znajšoŭ u nas try drennyja zuby.
Dakładnaje supadzieńnie z vynikami dvuch papiarednich centraŭ — «Kraviry» i «Biełaha nasoroha».
«Profident»
Miedycynski centr «Profident» dadaŭ u našu skarbonku novy zub, na jaki da hetaha nie źviarnuŭ uvahi ni adzin lekar.
Chočacca spadziavacca, što z zubami, jakija adlustravany ŭ hrafie «majuć patrebu ŭ lačeńni», pamyłak niama, a ŭ nas takich znajšli try štuki.
Pry hetym 28 zub raniej nikim z admysłoŭcaŭ nie adznačaŭsia.
«Jeŭradent»
Vyniki abśledavańnia ŭ stamatałahičnaj klinicy «Jeŭradent» vyklikali ŭ nas sapraŭdy surjoznyja aściarohi.
Zaklučeńnie doktara ŭvodzić u lohki šok. Stamatołah prapanuje vyrvać adrazu dva zuby mudraści, zapeŭnivajučy, što jany nie patrebnyja nie tolki nam, ale i nikomu ź ludziej. Raspaviadaje, jaki cudoŭny ŭ ich pracuje skivična-tvarny chirurh i pakidaje jaho vizitoŭku. Paviedamlaje, što vyryvańnie zuboŭ — heta chutki i absalutna narmalny praces, jaki nijak nie adabjecca na našym žyćci.
Rehistratar pryjemna ździŭlaje harantyjnym tałonam. Adnak paźniej akazvajecca, što ŭ im nie pakazali proźvišča pacyjenta — zamiest hetaha stajać zorački, a značyć, harantyja nie sapraŭdnaja. Bolš za toje, i na kansultacyjnym paviedamleńni, zroblenym na kryvym liściku, proźvišča niama.
Paźniej my źviarnulisia da inšych stamatołahaŭ z pytańniem nakont vyryvańnia zuboŭ i pačuli ćviordaje «Nie treba», a taksama doŭhaje tłumačeńnie, jakija nastupstvy heta moža mieć. Pakiniem lekaram sprečki ab nieabchodnaści pakidać ci vydalać zuby mudraści.
Zaklučeńnie «Jeŭradenta» — płambavańnie dvuch zuboŭ i vyryvańnie jašče dvuch.
«Ekamiedservis»
Biezumoŭnym lidaram pa vyjaŭleńni prablemnych zuboŭ akazaŭsia miedycynski centr «Ekamiedservis». Voś užo dzie sapraŭdy pacyjentu pryjdziecca raskašelicca.
U «Ekamiedsiervisie» my chadzili da adnaho z najlepšych stamatołahaŭ, čyimi dypłomami abviešanaja ściana ŭ kalidory.
Ideja pryjści na pryjom zahadzia siabie nie apraŭdvaje: lekar zatrymlivajecca, i nam davodzicca čverć hadziny čakać u kalidory. Stamatołah ŭ pryznačany čas vychodzić, pytajecca, ci hatovyja my pačakać, bo jana nie skončyła lačeńnia papiaredniaha pacyjenta, i prosić prabačeńnia.
Paśla taho jak nas zaprašajuć, za 40 siekund ahladu lekar znachodzić adrazu try drennyja zuby.
Paviedamlajem ab nieabchodnaści atrymać zaklučeńnie, kab stamatołah napisaŭ, jakija zuby, na jaho dumku, majuć patrebu ŭ lačeńni. Śpiecyjalist reahuje sa ździŭleńniem: «Našto heta? A inšyja lekary buduć hetaje zaklučeńnie bačyć?». I adrazu znachodzić apraŭdańnie svajoj reakcyi: «Nie chaču vykonvać pracu za inšych». Dziŭny adkaz, uličvajučy, što kansultacyja płatnaja, dy jašče adna z samych darahich siarod inšych centraŭ.
Pryjšłosia pierakonvać lekara, što nastupnaje lačeńnie budzie pravodzicca tolki ŭ jaje, list z zaklučeńniem nichto nie ŭbačyć, i naohuł, dakumient patrebien, kab dać kiraŭnictvu firmy — maŭlaŭ, jano i apłacić pasłuhi miedcentra.
Daviedaŭšysia, što apłata lačeńnia budzie rabicca za košt pradpryjemstva, lekarka raspłyvajecca va ŭśmiešcy i paviedamlaje: «Dyk davajcie ja jašče raz zrablu ahlad, moža, jašče znajdu drennyja zuby!» I na praciahu niekalkich siekund raptam znachodzicca jašče niekalki zuboŭ, jakija raptam pačynajuć mieć patrebu ŭ sanacyi. Doktar chichikaje, zapisvajučy ŭ zaklučeńnie čaćviorty, piaty zub… I, zadavolenaja, addaje nam zaklučeńnie: u «Ekamiedservisie» ŭ nas znajšli cełych šeść zuboŭ, jakija, na dumku stamatołaha, treba padlačyć!
Pry hetym try zuby naohuł nie paznačalisia ŭ jakaści prablemnych ni adnym ź dzieviaci inšych centraŭ.
Ahulnyja vyniki
Paśla ŭsich abśledavańniaŭ žurnalistka źviarnułasia da znajomaha stamatołaha, ź jakim u jaje skłalisia šmathadovyja davierlivyja adnosiny. Ad jaje my atrymali kateharyčnuju zajavu, što ŭ lačeńni maje patrebu tolki adzin zub — 17-y. Astatnija całkam dobryja. Praŭda, stamatołah ahavaryłasia, što lubomu doktaru nie składzie pracy abhruntavać nieabchodnaść lačeńnia i dvuch, i troch, i navat šaści zuboŭ, jak u «Ekamiedsiervisie». Na hetym i trymajecca ŭsia hetaja sistema.
My nie viedajem, chto z pryviedzienych vyšej miedycynskich centraŭ padmanvaje, a chto pracuje sumlenna.
Kamu vieryć i da kaho chadzić na pryjom, heta kožny pavinien vyrašyć dla siabie sam.
Ad siabie ž paraim spačatku prajści abśledavańnie ŭ dvuch-troch centrach, kab mieć mahčymaść paraŭnać vyniki. U adroźnieńnie ad lačeńnia, kansultacyja kaštuje nie tak užo doraha i siabie apraŭdvaje.
Siaredni košt kansultacyi składaje 60 tysiač rubloŭ. U niekatorych centrach i zusim 25 tysiač. Lepš zapłacić hetyja hrošy, čym potym lačyć paru-trojku zdarovych zuboŭ i vykidać na viecier sotni dalaraŭ.
Viadoma, u niekatorych centrach nie vielmi achvotna robiać adnu tolki kansultacyju i tym bolš nie chočuć davać na ruki miedycynskaje zaklučeńnie. Ale vy patrabujcie, vam nie majuć prava admović.
Apytanka
