Film Siarhieja Łaźnicy «U tumanie» — najlepšy na feście ŭ Tryjeście
Pra heta paviedamiła pres-sakratarka režysera Maryja Bejkier. Usie hałoŭnyja pryzy hetaha festyvalu prysudžajucca ŭ vyniku hałasavańnia hledačoŭ. «Mnie nadzvyčaj pryjemna atrymać hetuju ŭznaharodu, asabliva tamu, što heta pieršy pryz u majoj karjery, prysudžany hledačami, a nie žury», — skazaŭ Siarhiej Łaźnica.
Dziejańni filmu adbyvajucca ŭ 1942 hodzie ŭ akupavanaj Biełarusi. Puciavoha abchodčyka Suščeniu iłžyva abvinavačvajuć u supracoŭnictvie z akupantami. Dva partyzany prychodziać na chutar da Suščeni, kab pakarać jaho.
Film «U tumanie» raniej atrymaŭ prestyžny pryz žury Mižnarodnaj federacyi kinapresy FIPRESCI na 65-m Mižnarodnym kinafestyvali ŭ Kanach, Hran-pry VI Mižnarodnaha kinafestyvalu imia Andreja Tarkoŭskaha «Lusterka», pryz «Załaty abrykos» na IX Mižnarodnym kinafestyvali ŭ Jerevanie i ŭznaharodu Adeskaha mižnarodnaha festyvalu.
Režyser filmu Siarhiej Łaźnica naradziŭsia ŭ Baranavičach, paśla čaho siamja amal adrazu ž pierabrałasia ŭ Kijeŭ.
Karcinu źniali za 28 dzion u Łatvii. Heta mižnarodny kinaprajekt, jaho ŭdzielniki — «Biełaruśfilm», MA.JA.DE Fiction (Niamieččyna), kinakampanija «Džy Pi» (Rasieja), Rija Films (Łatvija), Lemming Film (Niderlandy), Fond padtrymki eŭrapiejskaha kino EURIMAGES.