Расійскі аўтапрам ліхаманіць: выпуск легкавых машын у маі зменшыўся на 96,7%
Па звестках Расстата, усяго ў Расіі ў студзені-маі было выпушчана 268 тыс. легкавых аўтамабіляў, што на 56,4% ніжэй, чым у гэты ж перыяд 2021 года. А выпуск легкавых аўтамабіляў у РФ па выніках мая ў параўнанні з аналагічным перыядам мінулага года паменшыўся ўвогуле на 96,7%, піша ТАСС.
Ілюстрацыйнае фота
У адносінах да красавіка гэтага года вытворчасць расійскіх легкавых аўтамабіляў знізілася на 81,3%.
Выпуск грузавых аўтамабіляў у РФ таксама прасеў, але не так значна. У маі ён зменшыўся на 39,3% (—38,2% да красавіка 2022 года), а за пяць месяцаў было выраблена 60,1 тыс. грузавікоў, што на 12% ніжэй за паказчык за аналагічны перыяд мінулага года.
Па аўтобусах сітуацыя залежыць ад іх велічыні. У студзені-маі 2022 года было выпушчана 4,8 тыс. аўтобусаў масай больш за 5 тон, што на 0,2% ніжэй, чым за аналагічны перыяд 2021 года. У маі ж вытворчасць знізілася на 6,5% у параўнанні з маем мінулага года і на 10,5% адносна красавіка 2022 года.
У той жа час вытворчасць аўтобусаў масай менш за 5 тон у маі знізілася на 77,4% (—42,5% да красавіка 2022 года). Усяго за першыя пяць месяцаў гэтага года было выпушчана 4 тыс. такіх аўтобусаў, што на 36,8% ніжэй, чым у мінулым годзе.
