Білі рукамі, рэменем, павадком, скакалкай. Прыёмных бацькоў з Ашмянскага раёна падазраюць у жорсткім абыходжанні з дзецьмі
Пра падзеі на Ашмяншчыне паведамляе Генпракуратура.
47-гадовая жанчына і 52-гадовы мужчына з 2014 года былі бацькамі-выхавацелямі дзіцячага дома сямейнага тыпу ў вёсцы Будзёнаўка. З 2016 да чэрвеня 2021 года яны жорстка абыходзіліся з дзецьмі: збівалі рукамі, рэменем, скакалкай, сабачым павадком, прымушалі падоўгу стаяць у куце, стаяць абапёршыся спінай да сцяны з напаўсагнутымі нагамі. Аднойчы яны зачынілі пяцігадовую дзяўчынку ноччу ў падвале дома.
Восем непаўналетніх дзяцей, самай малодшай на момант гвалту было 10 месяцаў, прызнаныя пацярпелымі па крымінальнай справе.
Пракуратура завяла па ўсіх гэтых фактах крымінальную справу, і перадала яе для папярэдняга расследавання ў Ашмянскі раённы аддзел Следчага камітэта.
Мужчына знаходзіцца пад вартай, яго жонка — на волі, але з абавязацельствам аб яўцы.
