Новы міністр юстыцыі анансаваў змяненні ў Выбарчы кодэкс

Раней размова шла толькі пра канстытуцыйную рэформу.

Новы міністр юстыцыі Сяргей Хаменка распавёў пра тое, што ў Выбарчым кодэксе адбудуцца змены.

«Мы стаім на парозе канстытуцыйнай рэформы, змяненняў у Выбарчы кодэкс. Гэта ўсё таксама запатрабуе ад калектыву Міністэрства юстыцыі дбайнай, высокапрафесійнай працы», — дадаў ён.

Таксама Хаменка сказаў, што міністэрству неабходна «больш аператыўна вырашаць пытанні прававога рэгулявання».

«Задачы перад міністэрствам ужо пастаўленыя кіраўніком дзяржавы. Сёння Міністэрства юстыцыі выконвае свае функцыі. Зыходзячы з ацэнкі сучаснай сацыяльна-палітычнай абстаноўкі, вядома, ёсць неабходнасць у больш аператыўным вырашэнні пытанняў, якія тычацца прававога рэгулявання», — заявіў міністр.

На лібералізацыі выбарчага заканадаўства доўгі час настойвала апазіцыя. Але ўлады ўвесь час казалі, што яшчэ не час. Цяпер, відаць, час прыйшоў, але дакладна гаворка ідзе не пра лібералізацыю.