Следства вызначылася з версіяй смерці Віталя Шышова ў Кіеве, але пакуль не раскрывае інфармацыю
Міністр унутраных справаў Украіны Дзяніс Манастырскі заявіў, што следства па справе смерці кіраўніка «Беларускага дома ва Украіне» Віталя Шышова ўжо вызначылася з версіяй трагедыі. Аднак канкрэтна не адказаў на пытанне.
«Я б аддаў права абвяшчэння вынікаў расследавання менавіта паліцыі. Магу сказаць, што паліцыя зараз прыцягнула міжнародных экспертаў для рэцэнзій заключэнняў атрыманых экспертыз. Калі будуць атрыманыя высновы, мы абвесцім інфармацыю, якая ёсць», — сказаў ён.
На ўдакладняючае пытанне журналіста: забойства або самагубства, Манастырскі адказаў: «Для следства зразумела, але хай усё ж такі скажа само следства».
Віталь Шышоў, адзін з заснавальнікаў «Беларускага дома ва Украіне», прапаў раніцай 2 жніўня ў Кіеве. Ён пайшоў на ранішнюю прабежку і не вярнуўся. На наступны дзень яго знайшлі павешаным у адным з лесапаркаў горада.
