«Белая яблыня грому» вырасла ў Вільні
На канцэрце‑прэзентацыі новага музычнага праекта Лявона Вольскага беларускія студэнты абдымаліся з літоўцамі.
На канцэрце‑прэзентацыі новага музычнага праекта Лявона Вольскага беларускія студэнты абдымаліся з літоўцамі.
Непасрэдна перад канцэртам у Вільні 17 красавіка, Лявон Вольскі наведаў Еўрапейскі гуманітарны універсітэт, дзе прайшла яго творчая сустрэча з моладдзю. У часе размовы студэнты і абітурыенты распытвалі спевака адносна апошняга музычнага праекта і працы ў творчай камандзе новага складу. Усе ахвотныя маглі папрасіць аўтограф або фотаздымак з айчыннай рок‑зоркай.
Увечары ж прайшоў другі пасля Мінска канцэрт у падтрымку альбома песень на вершы беларускіх класікаў «Белая яблыня грому». Вольскі сімвалічна пачаў выступ з кампазіцыі «Заснаванне Вільні» на словы Яна Чачота. У клубе «Mulen Ružas» паслухаць музыкаў сабраліся студэнты і адміністрацыя ЕГУ, мясцовыя беларусы, літоўская моладзь, што ў выніку склала нечакана ўражлівую колькасць слухачоў.
Пасля выключна паэтычнай асалоды некалькімі песнямі наведвальнікі пачалі прымяраць новы альбом да танцавальнага фармату.
І гэтае спалучэнне атрымалася ўдалым!
Пад хуткія рытмы прысутныя шчыра скокалі ад душы, а пры павольнай песні ўсе, абхапіўшы суседзяў за плечы, па‑кіношнаму гойдаліся з боку ў бок, не зважаючы на ступень знаёмства ці нацыянальнасць.
Адміністрацыя універсітэта на чале з рэктарам Анатолем Міхайлавым не проста вытрымала тон прыстойнасці, праслухаўшы пару ўступных песень, але прабыла да самага канца, уключна з бонус‑часткай выканання старых добрых хітоў «Крамбамбулі». Няхай праз моцную гучнасць музыкі і даводзілася часам прыкрываць вушы.
