Украіна запытвала ў краін NATO лічбавыя карты Беларусі, па якіх самалёты і дроны могуць лятаць на гранічна нізкіх вышынях — Le Monde
Па інфармацыі французскага выдання, Парыж перадаць такія карты адмовіўся.
Збітая расійская ракета. Фота: Felipe Dana (AP)
Лічбавыя даныя аб рэльефе мясцовасці (DTED) складаюцца з дапамогай спадарожнікаў і важныя для дэталізацыі тапаграфіі мясцовасці, піша Le Monde.
DTED не толькі дэталёва апісваюць рэльеф мясцовасці, але і ўлічваюць усе перашкоды (высакавольтныя лініі, ветравыя электрастанцыі, радары, зенітныя батарэі), якія могуць быць небяспечныя для самалёта.
Крыніца ў французскай арміі патлумачыла выданню, што такія карты аб'ядноўваюць усе тактычныя даныя, неабходныя для палётаў на вельмі нізкіх вышынях, ноччу або пры дрэннай бачнасці.
На думку эксперта, гэтыя карты, якія створаны з дапамогай спадарожнікаў і пастаянна абнаўляюцца, маглі б дапамагчы украінцам наладзіць беспілотнік для нанясення ўдару па аб'ектах у Беларусі па аналогіі з тымі, якія яны ўжо не раз наносілі ў Расіі і на акупаваных тэрыторыях, у прыватнасці па аэрадроме ў Энгельсе.
Па інфармацыі выдання, Украіна звярнулася да Францыі з просьбай пра карты Беларусі пасля таго, як ёй адмовілі іншыя краіны антыпуцінскай кааліцыі.
Францыя нароўні з іншымі краінамі-саюзніцамі дапамагае Украіне разведданымі, неабходнымі для распрацоўкі стратэгіі і тактыкі аперацый.
Парыж сцвярджае, што дае толькі дапамогу, патрэбную для абароны ўкраінскай тэрыторыі, а не для аперацый на замежных тэрыторыях.
Інфармацыя Le Monde «паказвае, што Кіеў сур'ёзна разглядае магчымасць правядзення аперацый на тэрыторыі Беларусі (што зусім не здзіўляе), — напісаў у сваім тэлеграм-канале аналітык Аляксандр Фрыдман. — Лічбавая карта, як падкрэслівае французскае выданне, дазваляе самалётам і беспілотнікам выконваць задачы на малой вышыні».
На думку аналітыка, «публікацыя выстаўляе Парыж у выгадным святле. Макрон па-ранейшаму бачыць сябе ў ролі міратворца (у тым ліку і разам з КНР), а адмова перадаць карту пацвярджае, што Францыя гатова дапамагаць Украіне абараняць сваю тэрыторыю, але будзе процідзейнічаць распаўсюджванню вайны на суседнія краіны».
Чытайце яшчэ:
Беларусь дала зброю ПВК «Вагнер», а Кітай адмовіў — Financial Times
«Контрнаступленне на ўсходзе ўжо ідзе» — намесніца міністра абароны Украіны
