Задзейнічана 500 інструктараў. Мінабароны расказала аб падрыхтоўцы расійскіх вайскоўцаў у Беларусі
Начальнік Галоўнага ўпраўлення баявой падрыхтоўкі Узброеных сіл генерал-маёр Аляксандр Бас распавёў пра тое, як праходзіць падрыхтоўка расійскіх вайскоўцаў на беларускіх палігонах. Рэгіянальная групоўка войскаў была разгорнута восенню мінулага года.
Аляксандр Бас. Фота: Мінабароны
«Навучаннем і падрыхтоўкай падраздзяленняў рэгіянальнай групоўкі войскаў займаецца больш за 500 беларускіх інструктараў. Яны маюць высокі ўзровень неабходных практычных навыкаў і ведаў. Гэты факт пацверджаны водгукамі расійскіх калег і вынікамі кантрольных заняткаў», — заявіў Бас.
Трэба адзначыць, што такую ж колькасць беларускіх вайсковых інструктараў згадваў падчас выступу з пасланнем народу і парламенту Аляксандр Лукашэнка.
Бас дадаў, што падрыхтоўка вядзецца на шэрагу палігонаў і ўчасткаў мясцовасці. Паводле яго слоў, у краіне створаны сучасная вучэбна-матэрыяльная база, трэнажорныя комплексы.
«Трэніровачны працэс заснаваны на сучасных формах і спосабах вядзення баявых дзеянняў. Створаны выдатныя бытавыя ўмовы. Сам працэс падрыхтоўкі заснаваны на вопыце вядзення баявых дзеянняў у ходзе спецыяльнай ваеннай аперацыі, мы адаптуем гэты вопыт і ўжываем для навучання асабовага складу, які ўваходзіць у склад рэгіянальнай групоўкі войскаў», — сказаў ён.
«Ажыццяўляецца падрыхтоўка як па асобных спецыяльнасцях, так і дзеяннях у складзе малых груп. Акцэнты робім на ўзаемазамяняльнасць, валоданне большасцю відаў узбраення, вядзенне баявых дзеянняў на любой мясцовасці, у тым ліку ў гарадскіх умовах, з выкарыстаннем БПЛА розных тыпаў і іншых сучасных узораў узбраення, вайсковай і спецыяльнай тэхнікі», — дадаў ён.
Расія перакінула з палігона пад Баранавічамі каля 1000 вайскоўцаў — разведка Брытаніі
