Мінчуку далі тры гады «хатняй хіміі» за ўдзел у дзвюх акцыях пратэсту ў 2020 годзе
На тры гады абмежавання волі без накіравання ва ўстанову адкрытага тыпу асуджаны за ўдзел у акцыях пратэсту ў 2020 годзе дапаможны рабочы аднаго з мінскіх прадпрыемстваў Юрый Працкевіч, піша «Вясна».
Справа разглядалася 27 лютага ў судзе Партызанскага раёна Мінска. Суддзя — Міхаіл Макарэвіч.
Працкевіча затрымалі 18 снежня 2022 года і да суда змясцілі ў следчы ізалятар.
Па матэрыялах абвінавачання, Юрый Працкевіч двойчы браў удзел у групавых дзеяннях, якія груба парушылі грамадскі парадак, а таксама пацягнулі парушэнне працы транспарту і прадпрыемстваў (ч. 1 арт. 342 Крымінальнага кодэкса). Так, у першым выпадку ён рухаўся па праезнай частцы вуліцы Даўгабродскай у складзе калоны працаўнікоў прадпрыемстваў, у другім выпадку па праспектах Незалежнасці і Пераможцаў.
Быў апазнаны па адзенні, а затым у ягоным тэлефоне следчыя знайшлі фотаздымкі з акцый пратэсту.
У судовым пасяджэнні сваю віну Працкевіч прызнаў цалкам.
Суд пакараў яго трыма гадамі «хатняй хіміі».
Мужчына быў вызвалены ў зале суда.
