У Мінску пачалі судзіць палітвязня, якога трымалі ў СІЗА больш за 2,5 года
Палітвязень Ілья Шапаткоўскі знаходзіцца ў СІЗА ўжо 2 гады 7 месяцаў і 12 дзён. Яго абвінавачваюць паводле ч. 1 арт. 357 КК («Змова ці іншыя дзеянні, учыненыя з мэтай захопу ўлады неканстытуцыйным шляхам»), паведамляе «Вясна».
Ілья Шапаткоўскі ў 2020 годзе браў актыўны ўдзел у працы выбарчага штаба Віктара Бабарыкі і ўзначальваў аддзел верыфікацыі подпісаў.
Быў затрыманы 4 жніўня 2020 года, яго спачатку змясцілі пад варту ў межах крымінальнай справы па «эканамічным» артыкуле. Аднак у канцы 2021 года артыкул змянілі на іншы — ч. 1 арт. 357 Крымінальнага кодэкса («Змова ці іншыя дзеянні, здзейсненыя з мэтай захопу дзяржаўнай улады»).
Паводле следства, «абвінавачваны адказваў за дэструктыўны інфармацыйны парадак, размяшчаў медыяматэрыялы, накіраваныя выключна на нанясенне шкоды рэпутацыі дзяржаўных органаў, праваахоўнага блока і прадстаўнікоў улады. Мэта — закласці зерне сацыяльна-палітычнага супрацьстаяння ў грамадстве.
Ён актыўна падзяляў ідэі злачынных фармаванняў і спрыяў ім у дасягненні пазначаных мэт шляхам забеспячэння інфармацыйнага суправаджэння, культываваў і прапагандаваў у грамадстве пратэсныя настроі».
Сёння ў Мінгарсудзе пачалі разглядаць справу палітвязня. Працэс вядзе суддзя Наталля Бугук.
Падтрымайце Ілью: СІЗА-1. 220030, Мінск, Валадарскага, 2, Ілья Уладзіміравіч Шапаткоўскі.
У Мінску затрымалі былога супрацоўніка СТБ Дзмітрыя Баяровіча і яго жонку ВІДЭА
