Стала вядома, калі ўступіць у сілу новы закон аб грамадзянстве
На Нацыянальным прававым інтэрнэт-партале апублікавалі новы Закон «Аб грамадзянстве Рэспублікі Беларусь». Паводле новай рэдакцыі пазбаўляць беларускага грамадзянства змогуць не толькі «экстрэмістаў».
«Грамадзянства Рэспублікі Беларусь страчваецца з прычыны паступлення асобы на вайсковую службу, службу ў паліцыю, органы бяспекі, юстыцыі ці іншыя дзяржаўныя органы замежнай дзяржавы», гаворыцца ў апублікаваным законе.
Паводле гэтай навелы, пазбавіцца беларускага грамадзянства могуць добраахвотнікі, якія бяруць удзел у вайне ва Украіне. У законе пішацца пра тых, хто ваюе з абодвух бакоў. Але, хутчэй за ўсё, гэта будзе тычыцца тых, хто ваюе на баку Украіны.
Норма аб пазбаўленні грамадзянства Беларусі тых, хто асуджаны за «экстрэмісцкую дзейнасць» і знаходзіцца за межамі краіны, засталася ранейшай. Гэта датычыцца і тых, хто з'яўляецца грамадзянінам Беларусі па нараджэнні і не мае пашпартоў іншых дзяржаў.
Зменены закон аб грамадзянстве ўступае ў сілу праз шэсць месяцаў пасля яго афіцыйнага апублікавання. Гэта значыць у ліпені 2023 года.
