ЗША ўзброяць Украіну «Марскімі вераб'ямі»
У рамках чарговага пакета ўзбраенняў Украіна атрымае ад ЗША не толькі бронемашыны Bradley і зенітныя комплексы Patriot, пра перадачу якіх ужо абвясціў Белы дом, але і кіраваныя ракеты RIM-7 Sea Sparrow («Марскі верабей»).
Пра гэта са спасылкай на свае крыніцы паведаміла выданне Politico.
Прызначаныя для перахопу паветраных цэляў ракеты Sea Sparrow былі прынятыя на ўзбраенне ў ЗША яшчэ ў 1976 годзе, аднак і праз амаль паўстагоддзя ўдасканаленыя версіі ракет выкарыстоўваюцца ВМС і марской пяхотай ЗША, а таксама флатамі іншых краін. Па даных Politico, украінскія вайскоўцы змогуць запускаць такія ракеты не з караблёў, а з наземных платформаў. Крыніцы выдання паведамілі, што для запуску Sea Sparrow атрымалася прыстасаваць пускавыя ўстаноўкі распрацаваных у часы СССР комплексаў «Бук».
Да гэтага часу ў якасці элементаў наземнай сістэмы СПА Sea Sparrow выкарыстаў толькі Тайвань, які атрымаў некалькі сотняў такіх ракет у пачатку 1990-х.
Sea Sparrow — распрацаваная карпарацыяй Raytheon кіраваная ракета класа «карабель — паветра» з паўактыўнай радыёлакацыйнай галоўкай саманавядзення. Далёкасць палёту ракеты і яе хуткасць ВМС ЗША не раскрываюць, аднак, па даных экспертаў, новыя версіі ракеты здольныя разганяцца да хуткасці, якая ў чатыры разы перавышае хуткасць гуку, і могуць знішчаць самалёты і крылатыя ракеты на адлегласці да 50 км.
