Каўбасы, сыры, грашовыя сертыфікаты. Што паклалі работнікам заводаў у навагоднія падарункі
Падарункамі ад прадпрыемстваў работнікі і іх жонкі хваляцца ў сацыяльных сетках. Некаторыя зайздросцяць.
Фота: сацсеткі
«Слуцкі сыраробны камбінат»
Каўбасы, маянэз, сыр, масла, два кілаграмы цукерак — такі навагодні падарунак склалі работнікам «Слуцкага сыраробнага камбіната». У дадатак выдалі і сертыфікат на 50 рублёў.
Такім прэзентам пахвалілася жонка работніка прадпрыемства ў тыктоку.
Каментатары пазайздросцілі: «Шанцуе людзям, не тое, што нам».
«Бабулін гарлачык»
Не адстаў ад слуцкіх сыравараў і малочны камбінат з Магілёва «Бабулін гарлачык». Там таксама работнікам раздалі харчовыя пакеты.
На відэа работніца паказвае, што атрымала каўбасу, макарону, а таксама некалькі найменняў харчоў, вырабленых камбінатам.
«Святочны стол амаль гатовы, чагосьці толькі не хапае, — адрэагавала на ўбачанае адна з падпісчыц. — Кіраўніцтву рэспект. У нас з гэтым зусім сумна».
«Ну, вядома ж, даяркам такія не далі…. Перапрацоўка ўсе вяршкі здымае…» — пажаліўся ў каментарах іншы чалавек.
Прадпрыемства «Палессе»
Сваім падарункам пахвалілася і работніца прадпрыемства «Палессе», якое вырабляе дзіцячыя цацкі з пластмасы.
У харчовым наборы сок, сыр, каўбаса, цукеркі і іншае смакоцце.
«Ну, хоць хтосьці задаволены падарункам ад арганізацыі», — пракаментаваў ролік адзін з гледачоў.
«Ды бздура гэтыя падарункі, галоўнае, колькі плацяць. Тут прыкладна 1,5 гадзіны маёй працы», — не вытрымаў наступны каментатар.
Прадпрыемства «Марка»
Віцебскае абутковае прадпрыемства «Марка» здзівіла работнікаў двума пакункамі цукерак, падарункавым сертыфікатам на 80 рублёў і яшчэ 250 рублямі гатоўкай.
«А нам нічога. Выхавальніцы. Мінск. Было б здароўе. Беражыце сябе і сваіх блізкіх», — пракаментавала адна з глядачак.
«Я таксама працую на «Марка», але мне даюць толькі сертыфікат, падарункі дзецям, а грошы не даюць», — абурылася калега аўтаркі відэа.
«Цэлы год працаваць за 550—600 з прэміяй, лепш ужо атрымліваць у 3 разы больш і самому купіць падарункі», — рэагуюць іншыя.
Беларуская чыгунка
Навагоднія падарункі дзецям работнікаў беларускай чыгункі больш сціплыя.
У пакунку шакалад, цукеркі і некалькі забавак. Яшчэ далі сертыфікат на 25 рублёў.
Разам з Новым годам прадпрыемства адзначае сваё 160-годдзе.
«Гомельскі домабудаўнічы камбінат»
Цукеркамі і сертыфікатам на 80 рублёў парадаваў працаўнікоў «Гомельскі домабудаўнічы камбінат».
Як выглядае падарунак паказала жонка работніка.
«Полацкшкловалакно»
Работнікі гэтага прадпрыемства адзначаць Новы год з цукеркамі, каўбасой, кансерваванай рыбай ды садавіной і гароднінай.
«Калі б з баблом нас так не кінулі, то зусім нармальна было б», — з'ездліва пракаментаваў убачанае адзін з карыстальнікаў.
«Беларуськалій»
Дзяцей работнікаў прадпрыемства павіншавала наборам цукерак у валізцы, расфарбаванай зімовым пейзажам.
Падарунак дзецям работнікаў «Беларуськалія». Скрыншот: фота з сацыяльных сетак
У сацыяльных сетках тыя, хто застаўся без падарункаў, абураюцца.
«Тут гаворка ідзе пра тое, што дзіця атрымае падарунак толькі ў тым выпадку, калі ходзіць у сад «Беларуськалія». А калі дзіця яшчэ ў яго не ходзіць, то падарунак не дадуць?» — незадаволена пытаецца ў адным з допісаў жанчына.
Бляшаныя шкатулкі, да краёў напоўненыя цукеркамі, падарылі і дарослым — супрацоўнікам і пенсіянерам.
Салігорская пенсіянерка з падарункам ад «Беларуськалія». Фота: esoligorsk.by
«Віцебскі завод трактарных запасных частак»
Дзяцей работнікаў віцебскага прадпрыемства прафкам павіншаваў цукеркамі кандытарскай фабрыкі «Камунарка». У кожным падарунку — па 1,5 кілаграма слодычы.
Навагоднія падарункі дзецям работнікаў «Віцебскага завода трактарных запасных частак». Фота: трактор.бел
У каталогу «Камунаркі» такі набор цукерак каштуе 30 рублёў.
«Наша Нiва» — бастыён беларушчыны
ПАДТРЫМАЦЬЦуд на Каляды. Беларусы сабралі грошы на падарункі 184 дзецям палітвязняў
Каля мінскага Палаца спорту паставілі рыцарскае мястэчка і атракцыёны
Як зрабіць добры падарунак?
