Ціханоўская параўнала рэжым Лукашэнкі з «крэслам з трыма ножкамі»
Святлана Ціханоўская заклікала міністраў замежных спраў Еўрасаюза змякчыць візавыя працэдуры для беларусаў.
Фота прэс-службы Святланы Ціханоўскай
Святлана Ціханоўская бярэ ўдзел у сустрэчы міністраў замежных спраў краін Еўрасаюза па запрашэнні Вярхоўнага прадстаўніка па замежных справах Жазэпа Барэля. Прымалі ўдзел 17 міністраў. Амаль усе ўзялі слова і выказалі падтрымку Беларусі.
У сваім выступе Ціханоўская заклікала да наступных дзеянняў.
— Змякчыць візавыя працэдуры для беларусаў, узмацніць адукацыйныя і культурныя абмены, падтрымку прыватнага бізнесу, не звязанага з рэжымам.
— Працягнуць падтрымку медыя і грамадзянскай супольнасці.
— Перазапусціць Маскоўскі механізм у АБСЕ ў дачыненні да рэжыму Лукашэнкі.
— Не падтрымліваць адносіны з нелегітымным рэжымам Лукашэнкі і не весці перамовы за спінамі беларусаў.
— Інстытуцыялізаваць адносіны з дэмакратычнымі сіламі ў Еўрапейскім парламенце, па прыкладзе Рады Еўропы.
— Запрасіць Беларусь у еўрапейскую палітычную супольнасць (праект ініцыяваны Эмануэлем Макронам), але каб Беларусь прадстаўлялі дэмакратычныя сілы, а не рэжым.
— Падтрымаць беларускіх актывістаў, валанцёраў і добраахвотнікаў ва Украіне.
— Працягнуць супрацоўніцтва з Беларуссю ў межах Усходняга партнёрства.
Ціханоўская заклікала краіны ЕС заступіцца за беларускую незалежнасць: «Мы лічым, што вайну можна скончыць хутчэй, калі расійскія войскі выйдуць і Беларусь пяройдзе да дэмакратыі. Рэжым — гэта як крэсла з трыма ножкамі, на якіх ён стаіць: рэпрэсіі, грошы і Крэмль. Калі рухне хоць адна з гэтых ножак, рухне і ўвесь рэжым. Я заклікаю ЕС дзейнічаць рашуча па вырашэнні крызісу ў Беларусі. Зараз самы час падтрымаць намаганні беларусаў па абароне незалежнасці свайго народа», — сказала Ціханоўская ў выступленні.
