Зяленскі да жыхароў акупаваных тэрыторый: Беражыце сваё жыццё і дапамагайце нам аслабляць і знішчаць акупантаў
У сваім чарговым вячэрнім звароце прэзідэнт Украіны Уладзімір Зяленскі ў сувязі з «рэферэндумамі» і расійскай мабілізацыяй звярнуўся да жыхароў акупаваных украінскіх тэрыторый і параіў, што ім трэба рабіць.
«У мяне ёсць простая просьба да ўсіх нашых людзей, якія знаходзяцца на часова акупаваных тэрыторыях: рабіце галоўнае — беражыце сваё жыццё і дапамагайце нам аслабляць і знішчаць акупантаў.
Любым спосабам хавайцеся ад расійскай мабілізацыі. Пазбягайце позваў. Старайцеся выехаць на свабодную тэрыторыю Украіны.
А калі вы ўжо трапіце ў расійскую армію, то сабатуйце любую варожую актыўнасць, перашкаджайце любым расійскім аперацыям, перадавайце нам усю важную інфармацыю пра акупантаў: іх базы, штабы, склады боепрыпасаў.
І пры першай жа нагодзе пераходзьце на нашы пазіцыі. Рабіце ўсё, каб захаваць жыццё і дапамагчы вызваліць Украіну».
Сярод іншага Зяленскі згадаў, што, паводле яго інфармацыі, у анексаваным Крыме расійскія акупацыйныя ўлады спрабуюць набраць у сваё войска як мага больш крымскіх татараў, спадзеючыся выкарыстаннем іх у якасці «гарматнага мяса» вырашыць такім чынам праблему з імі.