«Лісты ў клетачку» закрыліся, бо пабачылі, што не даходзяць
Ініцыятыва «Лісты ў клетачку», з дапамогай якой можна было пісаць палітвязням, спыняе існаванне. Прычына ў тым, што ўжо больш за паўгода яны не атрымліваюць адказаў.
«Апошнім часам, ужо больш за паўгода, мы не атрымліваем адказаў. Наогул. Гэта вельмі засмучае і ставіць пад сумнеў сэнс і карыснасць нашай працы. У тых, хто выходзіць на волю, мы цікавімся — ці атрымлівалі яны нашы лісты. І даволі часта аказваецца, што не атрымлівалі. Нам вельмі не хочацца проста спансіраваць Белпошту і выкідваць у скрыню тысячы канвертаў і лістоў, а таксама траціць грошы людзей і час валанцёраў», — паведамляюць аўтары праекта.
Яны таксама зазначаюць, што ў праекта не хапае рук і рэсурсаў на аператыўную апрацоўку лістоў, а таксама на менеджмент шматлікіх задач.
«На жаль, у гэтых умовах мы не можам справіцца з гэтымі выклікамі і прымаем рашэнне закрыць ініцыятыву».
Гэтая ініцыятыва была бясплатнай. Людзі дасылалі валанцёрам электронны ліст для палітвязня, а тыя ўжо раздрукоўвалі яго і адпраўлялі. Ініцыятыва працавала са снежня 2020 года.
Данаты, якія засталіся, прадстаўнікі ініцыятывы абяцаюць пераправіць на іншыя праекты.
