«Фізічная цэласнасць АЭС была парушаная некалькі разоў». Кіраўнік МАГАТЭ распавёў пра стан Запарожскай АЭС
Кіраўнік МАГАТЭ Рафаэль Гросі вярнуўся на падкантрольную Украіне тэрыторыю і расказаў журналістам пра стан Запарожскай АЭС. Ён правёў на станцыі некалькі гадзін.
«Відавочна, што фізічная цэласнасць электрастанцыі была парушаная некалькі разоў. Так не можа працягвацца», — цытуе словы Гросі «Бі-бі-сі».
Паводле Гросі, яму ўдалося абысці ўсю Запарожскую АЭС і ўбачыць ключавыя часткі станцыі. У прыватнасці, аварыйныя сістэмы і дыспетчарскія. Цяпер яго каманда, якая засталася на АЭС, будзе аналізаваць тэхнічныя аспекты.
«Мы нікуды не адыходзім. МАГАТЭ цяпер там, на электрастанцыі, і інспектары не сыходзяць — яны застануцца там», — падкрэсліў Гросі.
Ён таксама адзначыў, што спецыялісты агенцтва дадуць бесстароннюю, нейтральную і тэхнічна абгрунтаваную ацэнку таго, што адбываецца на Запарожскай АЭС.
Акрамя таго, Гросі распавёў пра абстрэлы ў раёне Запарожскай АЭС, якія яму ўдалося асабіста ўбачыць.
«Былі моманты, калі было відавочна, што страляюць: кулямётны агонь, мінамёты. Два-тры разы было сапраўды вельмі трывожна, я б сказаў, для ўсіх нас», — сказаў ён.
Расія і Украіна абвінавачваюць адно аднаго ў абстрэлах станцыі і горада Энергадара. Агонь не спыняўся нават у дзень прыезду місіі МАГАТЭ, з-за чаго экспертам давялося затрымацца на тры гадзіны.
Расійскія войскі захапілі Запарожскую АЭС неўзабаве пасля пачатку ўварвання ва Украіну, у сакавіку 2022 года. З таго часу Кіеў і Масква неаднаразова абвінавачвалі адно аднаго ў абстрэлах тэрыторыі побач з АЭС. На пачатку жніўня ў МАГАТЭ казалі, што на Запарожскай АЭС масава парушаюць пратаколы бяспекі.