Адміністрацыйную справу журналісткі Таццяны Матвеевай накіравалі на дапрацоўку ў міліцыю
У судзе Кастрычніцкага раёна Віцебска распачаўся працэс над журналісткай Таццянай Матвеевай, былой супрацоўніцай Tut.by. Яе вінавацяць у несанкцыянаваным пікетаванні за размяшчэнне ў Фэйсбуку фотаздымка з малюнкам белага і чырвонага колераў. Суддзя Уладзімір Царыкаў распачаў судовае пасяджэнне, але яно скончылася менш як праз паўгадзіны — ён заўважыў памылкі ў пратаколе, піша «Вясна».
Бок абвінавачання на судзе прадстаўляў супрацоўнік РАУС Кастрычніцкага раёна Уладзіслаў Шышкавец, які і склаў адміністрацыйны пратакол на журналістку. Ён напісаў, што жанчына размясціла на сваёй старонцы ў Фэйсбуку «фотаздымак з бела-чырвона-белым сцягам, публічна выражаючы асабістыя погляды на падзеі грамадска-палітычнага жыцця», не запытаўшыся дазволу ў райвыканкама.
Міліцыянт угледзеў у гэтым прыкметы несанкцыянаванага пікетавання і кваліфікаваў дзеянні Таццяны паводле артыкула 24.23 КаАП.
