З 2020 года ў Беларусі ліквідаваныя 880 некамерцыйных арганізацый
Праваабарончыя арганізацыі Lawtrend і ОЕЕС паведамляюць у сваім аглядзе за ліпень, што са жніўня 2020 года грамадскі сектар Беларусі недалічыўся 880 некамерцыйных арганізацый. Толькі ў ліпені 2022-га былі прымусова ліквідаваныя 72 з іх.
Фота ілюстрацыйнае
Праваабаронцы сцвярджаюць, што «практыка рэпрэсій у Беларусі не спыняецца». Рашэнне самаліквідавацца прынялі агулам 343 арганізацыі. Адзначаюць, што «рашэнне пра самаліквідацыю прымаецца найперш праз неспрыяльнае прававое асяроддзе, агульную грамадска-палітычную сітуацыю ў краіне, а таксама — пад ціскам уладаў».
Толькі за ліпень 2022 года колькасць прымусова ліквідаваных некамерцыйных арганізацый вырасла на 72. Сярод іншага па ісках генпракурора Вярхоўны Суд вынес рашэнні аб спыненні дзейнасці ўсіх незалежных прафсаюзаў, якія існавалі ў краіне.
