Гуманітарныя віды на жыхарства беларусам у Польшчы будуць выдаваць пры ўмове, што яны не будуць ездзіць у Беларусь
Падчас візіту Святланы Ціханоўскай у Польшчу прадстаўнікі Офіса Крысціна Рыхтэр і Франак Вячорка ўзялі ўдзел у сустрэчы рабочай групы пры МУС, на якой Польшча акрэсліла навіны для беларусаў.
Офіс па справах замежнікаў Польшчы апублікаваў інфармацыю аб новым дазволе на часовае знаходжанне для беларусаў, якія маюць гуманітарныя візы — гуманітарным дазволе на жыхарства. Новая працэдура ўступае ў сілу 9 ліпеня. Прававой падставай з'яўляецца п. 9 ч. 1 арт. 186 закона «Аб іншаземцах».
«Такі дазвол на жыхарства будзе выдавацца ў сувязі з тым, што грамадзянін не можа вярнуцца ў Беларусь. І ён выключае магчымасць падарожжаў у Беларусь. Парушэнне гэтага правіла можа быць расцэненае польскімі ўладамі як парушэнне правілаў выдачы гэтых дазволаў і вам можа пагражаць штраф з забаронай на ўезд у ЕС», — патлумачыла Крысціна Рыхтэр.
У сустрэчы рабочай групы ўзяла ўдзел і намесніца дырэктара консульскага дэпартамента МЗС. Яна паведаміла пра гатоўнасць прымаць заявы на выдачу візаў з 1 жніўня ў Варшаве. У верасні такая магчымасць з'явіцца ў Беластоку, Любліне і Познані.
Атрымаць гуманітарную візу змогуць грамадзяне Беларусі:
— якія прыбылі з Украіны пасля 24 лютага і якія знаходзіліся на тэрыторыі Украіны легальна да 24 лютага;
— у якіх ужо ёсць гуманітарныя польскія візы і якія знаходзяцца на тэрыторыі Польшчы.
МЗС разгледзіць магчымасць пашырэння катэгорый беларусаў, якія могуць атрымаць візы на тэрыторыі Польшчы.
